പട്‌ന: കന്നുകാലികളുടെ മോഷണം തടയുന്നതിനായി സുരക്ഷാ കയറൊരുക്കി 12ാം ക്ലാസ് വിദ്യാര്‍ഥി കര്‍ഷകര്‍ക്കിടയില്‍ ഹീറോ ആയി. പുരുണിയ ജില്ലയിലെ ഗോത്രവിഭാഗക്കാര്‍ താമസിക്കുന്ന ഗ്രാമത്തിലെ 12ാം ക്ലാസ് വിദ്യാര്‍ഥി രാജേഷ് ഹന്‍സ്ദാ ആണ് സുരക്ഷാ കയര്‍ നിര്‍മിച്ചത്. മേഖലയില്‍ കന്നുകാലി മോഷണം വ്യാപകമായ സാഹചര്യത്തിലാണ് ഇത് തടയുന്നതിനായി ഈ വിദ്യാര്‍ഥി പശുക്കള്‍ക്കായി സുരക്ഷാ കയര്‍ ഉണ്ടാക്കിയത്. 12 വോള്‍ട്ടിലുള്ള ബാറ്ററിയിലാണ് കയറിലെ സുരക്ഷാ സംവിധാനം പ്രവര്‍ത്തിക്കുക. ചെമ്പുകമ്പിയോ അല്ലെങ്കില്‍ അലൂമിനിയം കമ്പിയോ കയറില്‍ ഘടിപ്പിക്കും. ഇതിലൂടെ വൈദ്യുതി കടത്തിവിട്ട് മോഷ്ടാക്കളെ ഷോക്കടിപ്പിക്കും. ഇതിനുപുറമെ കയറില്‍ ആരെങ്കിലും തൊട്ടാല്‍ അപ്പോള്‍ തന്നെ അലാറം മുഴങ്ങുകയും ചെയ്യും. ഈ സംവിധാനത്തിന് അധികം പണച്ചെലവില്ലെന്നും രാജേഷ് പറയുന്നു. തന്റെ അധ്യാപകന്‍ സന്തോഷ് കുമാറിന്റെ മാര്‍ഗ നിര്‍ദേശപ്രകാരമാണ് സംവിധാനം കണ്ടുപിടിച്ചതെന്ന് രാജേഷ് പറയുന്നു.