എന്റെ സ്വപ്‌നത്തിന്റെ യൊടുക്കമാണ്
നിന്റെ കാലടി ശബ്ദം കേട്ടത്.
കാല്‍വിരലിലൂന്നി
മെല്ലെ മെല്ലെ നീ
അകത്തേക്കു വന്നു.
ഒരു പൂച്ചക്കുട്ടിയെപോലെ
നീയെന്റെ പുതപ്പിനുള്ളിലേക്കു കയറി.
നിന്റെ കണ്ണുകള്‍
എന്നെ കോരിക്കുടിച്ചു.
ഉറക്കിലാണോ
ഉണര്‍വിലാണോ എന്നറിയില്ല
എന്റെ സ്വപ്‌നത്തെ
നീ മടിയിലിരുത്തി താരാട്ടി.
നീയപ്പോള്‍
കൈകള്‍കൊണ്ട്
എന്റെ കഴുത്തില്‍ ഇറുകെ പുണര്‍ന്നിരുന്നു.
എന്നിട്ട്,
തലയിണയില്‍
ചേര്‍ന്നു കിടന്നുറങ്ങി.
അപ്പോള്‍
ഞാനെന്റെ സ്വപ്‌നത്തെ
നിന്നിലേക്ക് പറത്തിവിട്ടു.