പെരിങ്ങോട്ടുകുര്‍ശ്ശി: ജില്ലയില്‍ കഴിഞ്ഞ കുറെ മാസങ്ങളായി അനുഭവപ്പെടുന്ന കാലാവസ്ഥ വ്യതിയാനത്തില്‍ നെല്‍പാടങ്ങള്‍ തരിശാവുന്നത് കര്‍ഷകരെ കണ്ണീരിലാഴ്ത്തിയിരിക്കുകയാണ്.
വന്യജീവന ആക്രമണത്തിനു പുറമെ ഇത്തരത്തിലുള്ള കാലാവസ്ഥാ വ്യതിയാനത്തില്‍ ഹെക്ടര്‍ കണക്കിനെ നെല്‍പാടങ്ങള്‍ തരിശായി മാറിയതോടെ ആയിരക്കണക്കിനു കര്‍ഷകരാണ് ദുരിതത്തിലായിരിക്കുന്നത്. കോട്ടായി, പെരിങ്ങോട്ടുകുര്‍ശ്ശി, ചിറ്റൂര്‍, നെന്മാറ മേഖലകളിലും മണ്ണാര്‍ക്കാട് മേഖലയിലെ തെങ്കര, മേലാമുറി, കൊറ്റിയോട് മേഖലകളിലുമാണ് ഏക്കര്‍ കണക്കിനു നെല്‍പ്പാടങ്ങള്‍ തരിശായിരിക്കുന്നത്.
കടുത്ത ചൂടിനു പുറമെ മതിയായ അളവില്‍ മഴ ലഭിക്കാത്തതും ചില സമയങ്ങളില്‍ ശക്തമായ മഴയുമൊക്കെയാണ് കാര്‍ഷിക മേഖലയെ പ്രതിസന്ധിയിലാക്കുന്നത് നെല്‍കൃഷി ഉപജീവനമാര്‍ഗ്ഗമായി മാത്രം കാണുന്ന ആയിരക്കണക്കിനു കര്‍ഷകരാണ് ഇപ്പോള്‍ എന്തു ചെയ്യണമെന്നറിയാതെ തലയില്‍ കൈവെക്കുന്നത്.
ഒരുമാസം മുമ്പുണ്ടായ പ്രളയത്തിലും അതിനു ശേഷമുണ്ടായ കടുത്ത വേനലും മൂലം നശിച്ചത് ഹെക്ടര്‍ കണക്കിനു നെല്‍പാടങ്ങളാണ് മണ്ണാര്‍ക്കാട് മേഖലയില്‍ മാത്രം 5 കോടി രൂപയുടെ നാശനഷ്ടങ്ങളാണ് കാര്‍ഷിക മേഖലയിലുണ്ടായിട്ടുള്ളത്. നെല്‍കൃഷിക്കുപുറമെ കവുങ്ങ്, വാഴ, കുരുമുളക്, കപ്പ, കൂര്‍ക്ക എന്നി വിളകളിറക്കി ജീവിക്കുന്നവര്ക്കു കാലാവസ്ഥാ വ്യതിയാനം തിരിച്ചടിയായിരിക്കുകയാണ്.
എന്നാല്‍ കൃഷി നശിച്ചവര്‍ക്കുള്ള ധനസഹായ വിതരണവും ലഭിക്കുന്നില്ലെന്ന ആരോപണങ്ങളാണുയരുന്നത്. ജില്ലയില്‍ മാത്രം ആയിരക്കണക്കിനു നെല്‍കര്‍ഷകരാണ് കൃഷി നശിച്ചതിന്റെ പേരില്‍ ധനസഹായത്തിനായി കാത്തിരിക്കുന്നത് ആയിരക്കണക്കിനു കര്‍ഷകരാണ് കാലാവസ്ഥാ വ്യതിയാനത്താല്‍ മിക്ക കര്‍ഷകരും കാര്‍ഷികവിളകളിറക്കാന്‍ മടിക്കുന്ന അവസ്ഥയാണ് നെല്‍കര്‍ഷകര്‍ക്ക് സര്‍ക്കാറിന്റെ ഭാഗത്തുനിന്നു സഹായം ലഭിക്കാത്തതും കര്‍ഷകരെ ദുരിതത്തിലാക്കുകയാണ്. മാസാന്തരങ്ങളിലുണ്ടാവുന്ന ഇത്തരം കാലാവസ്ഥാ വ്യതിയാനം നെല്ലറയുടെ നാട്ടില്‍ നെല്‍കൃഷി ഇല്ലാതാക്കുന്ന അവസ്ഥയിലേക്കെത്തിക്കുകയാണ്.