ന്യൂഡല്‍ഹി: വെറ്ററന്‍ ഇന്ത്യന്‍ ഓപണര്‍ ഗൗതം ഗംഭീറിന് നാല് ഫസ്റ്റ് ക്ലാസ് മത്സരങ്ങളില്‍ വിലക്ക്. ഇക്കഴിഞ്ഞ രഞ്ജി സീസണിനിടെ ഡല്‍ഹി കോച്ച് കെ.പി ഭാസ്‌കര്‍ പിള്ളൈക്കെതിരേ അപമര്യാദയായി പെരുമാറിയതിനാണ് താരത്തിനെ നാല് കളികളില്‍ സസ്പന്‍ഡ് ചെയ്തത്. അന്വേഷണ കമ്മിറ്റിയുടെ റിപ്പോര്‍ട്ടിന്റെ അടിസ്ഥാനത്തിലാണ് ഗംഭീറിനെതിരായ നടപടി. ഇക്കഴിഞ്ഞ മാര്‍ച്ച് ആറിനാണ് കോച്ചും അന്ന് ഡല്‍ഹി രഞ്ജി ടീം നായകനുമായ ഗംഭീറും തമ്മില്‍ പ്രശ്‌നങ്ങള്‍ ഉടലെടുത്തത്. കോച്ചുമായി കയര്‍ത്ത് സംസാരിച്ചതിനെ തുടര്‍ന്ന് ഗംഭീറിനെ നായക സ്ഥാനത്ത് നിന്ന് മാറ്റി റിഷഭ് പന്തിനെ ഡല്‍ഹിയുടെ ക്യാപ്റ്റനാക്കിയിരുന്നു.