കൊച്ചി: ശബരിമലയിലെ പൊലിസ് നടപടികള്‍ കേന്ദ്രസര്‍ക്കാരിന്റെ മുന്നറിയിപ്പനുസരിച്ചായിരുന്നുവെന്ന് സംസ്ഥാന സര്‍ക്കാര്‍ ഹൈക്കോടതിയെ അറിയിച്ചു. തമിഴ്‌നാട്, കര്‍ണാടക സംസ്ഥാനങ്ങളില്‍ നിന്നും തീവ്രസ്വഭാവമുള്ള ചില വിഭാഗങ്ങള്‍ ശബരിമലയില്‍ എത്തിയേക്കാമെന്ന് കേന്ദ്ര ഇന്റലിജന്‍സിന്റെ മുന്നറിയിപ്പ് ലഭിച്ചിരുന്നു. എന്നാല്‍ യഥാര്‍ഥ ഭക്തരേയും മാധ്യമപ്രവര്‍ത്തകരേയും പൊലിസ് തടഞ്ഞിട്ടില്ലെന്നും സര്‍ക്കാര്‍ സത്യവാങ്മൂലം നല്‍കി. ശബരിമലയില്‍ മാധ്യമവിലക്കിനെതിരെ നല്‍കിയ ഹരജിയിലാണ് സര്‍ക്കാരിന്റെ വിശദീകരണം.

സുരക്ഷയുടെ ഭാഗമായി ശബരിമലയില്‍ നാലാം തിയതി വെര തിരച്ചില്‍ നടപടികള്‍ നടത്തിയിരുന്നു. ഇത് പൂര്‍ത്തിയായതിന് ശേഷമാണ് മാധ്യമങ്ങളെയടക്കം കടത്തിവിട്ടത്. മാധ്യമപ്രവര്‍ത്തകരുടെ സുരക്ഷകൂടി കണക്കിലെടുത്തായിരുന്നു ഈ നടപടിയെന്നും സര്‍ക്കാര്‍ കോടതിയെ അറിയിച്ചു.