ഗുരുവായൂര്‍: കിഴക്കെ നടയിലെ ഗാന്ധിസ്മൃതി മണ്ഡപം സാമൂഹ്യവിരുദ്ധരുടെ താവളമായി മാറുന്നുവെന്ന് ആക്ഷേപം. ലൈബ്രറി അങ്കണത്തില്‍ കിഴക്കെ അറ്റത്തായാണ് മണ്ഡപം സ്ഥിതി ചെയ്യുന്നത്. മദ്യപരും മയക്കുമരുന്നിനടിമപ്പെട്ടവരും ഇവിടെയാണ് തമ്പടിക്കുന്നത്.
മതിലിന് ഉയരം കുറവായതിനാല്‍ രാത്രിയില്‍ റോഡില്‍ നിന്നും ലൈബ്രറി അങ്കണത്തിലേക്ക് ഇത്തരക്കാര്‍ക്ക് പ്രവേശിക്കാന്‍ എളുപ്പമാണ്. രാത്രിയില്‍ വേണ്ടത്ര വെളിച്ചമില്ലാത്തതും ഇവര്‍ക്ക് തുണയാകുന്നു. ഇത്തരക്കാര്‍ പകല്‍സമയത്ത് നഗരസഭ ലൈബ്രറിയില്‍ ഇരുന്നുറങ്ങുന്നത് വായിക്കാനെത്തുന്നവര്‍ക്ക് അരോചകം സൃഷ്ടിക്കുന്നതായും പരാതിയുണ്ട്. ഗാന്ധിസ്മൃതി മണ്ഡപത്തേയും ലൈബ്രറിയേയും സാമൂഹ്യവിരുദ്ധരില്‍ നിന്നും സംരക്ഷിക്കണമെന്നാവശ്യപ്പെട്ട് വിചാര്‍ വിഭാഗ് ഗുരുവായൂര്‍ മണ്ഡലം കമ്മിറ്റി നഗരസഭ സെക്രട്ടറിക്ക് നിവേദനം നല്‍കി.