നിസാര്‍ കലയത്ത്

ജിദ്ദ: സഊദി ഏര്‍പ്പെടുത്തിയ ടൂറിസം വിസകള്‍ ഇന്ത്യക്കാര്‍ക്കും ലഭിച്ചു തുടങ്ങി. മുംബൈ കോണ്‍സുലേറ്റില്‍ നിന്നും ഒരു മാസത്തേക്കുള്ള ടൂറിസം വിസയാണ് ലഭിച്ചത്. ഒരു വര്‍ഷം കാലാവധിയുള്ള മള്‍ട്ടിപ്പിള്‍ എന്‍ട്രി ടൂറിസം വിസയും ഉടന്‍ ലഭ്യമാകുമെന്ന് ട്രാവല്‍ ഏജന്റുമാര്‍ പറഞ്ഞു. അപേക്ഷക്കൊപ്പം വിവിധ രേഖകള്‍ ഇതിനായി സമര്‍പ്പിക്കണം.

ഒരു വര്‍ഷത്തേക്കും ഒരു മാസത്തേക്കുമാണ് ടൂറിസ്റ്റ് വിസകള്‍ സഊദിയിലേക്ക് അനുവദിച്ചത്. ഓണ്‍ അറൈവല്‍ വിസയും ഓണ്‍ലൈന്‍ ടൂറിസ്റ്റ് വിസയും ആദ്യ ഘട്ടത്തില്‍ ഇന്ത്യയൊഴികെ 49 രാജ്യങ്ങള്‍ക്ക് മാത്രമാണ് അനുവദിച്ചത്. എന്നാല്‍ ഇന്ത്യയുള്‍പ്പെടെ ലിസ്റ്റില്‍ പെടാത്ത രാജ്യങ്ങള്‍ക്ക് വിസ ലഭിക്കുമെന്ന് നേരത്തെ അറിയിച്ചിരുന്നു. 

രേഖകളുമായി നിശ്ചിത അപേക്ഷാഫോറത്തില്‍ ഏജന്റുമാര്‍ മുഖേനയോ നേരിട്ടോ കോണ്‍സുലേറ്റില്‍ അപേക്ഷിക്കാം. ഭര്‍ത്താവാണ് പോകുന്നതെങ്കില്‍ ഭാര്യക്കും മക്കള്‍ക്കും വിസ ലഭിക്കുന്നുണ്ട്. എന്നാല്‍ ഭാര്യക്ക് ഒറ്റക്ക് അപേക്ഷ നല്‍കണമെങ്കില്‍ മേല്‍പറഞ്ഞ രേഖകള്‍ അത്യാവശ്യമാണെന്ന് ഏജന്റുമാര്‍ പറയുന്നു. 

കഴിഞ്ഞ ദിവസമാണ് ആദ്യമായി ടൂറിസം വിസ ഒരു മാസത്തേക്കുള്ളത് സ്റ്റാമ്പ് ചെയ്തത്.