ദോഹ: മിക്‌സഡ് റിലേയില്‍ ഫൈനലിലെത്തിയ പ്രതീക്ഷയില്‍ വനിത, പുരുഷ 4-400 റിലേയില്‍ ഇന്ത്യ ഇന്നിറങ്ങുന്നു. മലയാളിത്തിളക്കമുള്ള ഇരുവിഭാഗവും കഴിഞ്ഞ ചാംപ്യന്‍ഷിപ്പില്‍ മങ്ങിയ പ്രകടനമാണ് കാഴ്ചവച്ചത്. ഇരു ടീമും ഫൈനല്‍ കാണാതെ പുറത്തായി. എങ്കിലും ഖത്തര്‍ ചാംപ്യന്‍ഷിപ്പിലൂടെ അരങ്ങേറ്റം കുറിച്ച മിക്‌സഡ് റിലേയില്‍ ഫൈനലിലെത്തിയത് ഇന്ത്യക്ക് പ്രതീക്ഷ നല്‍കുന്നു. മിക്‌സഡ് റിലേയില്‍ ഇറങ്ങിയ മുഹമ്മദ് അനസും നോഹ് നിര്‍മല്‍ ടോമും പുരുഷ ടീമിലും ജിസ്‌ന മാത്യുവും വി.കെ വിസ്മയും വനിതാ ടീമിലും ഇറങ്ങുന്നത് ഇന്ത്യയുടെ ഫൈനല്‍ സാധ്യതക്ക് വെളിച്ചം നല്‍കുന്നു. 

2017ല്‍ ലണ്ടനില്‍വച്ച് നടന്ന ചാംപ്യന്‍ഷിപ്പിലെ പുരുഷ ടീമില്‍ അനസും അമോജ് ജേക്കബും ട്രാക്കിലിറങ്ങിയിരുന്നെങ്കിലും ഫൈനലിലെത്താനായില്ല. വനിതകളില്‍ എം.ആര്‍ പൂവമ്മയും ജിസ്‌ന മാത്യുവും ഉള്‍പ്പെട്ട ടീം മത്സരിച്ചെങ്കിലും നിരാശയായിരുന്നു ഫലം. 

മലയാളികളായ മുഹമ്മദ് അനസ്, നോഹ് നിര്‍മല്‍ ടോം, അലക്‌സ് ആന്റണി, അമോജ് ജേക്കബ് എന്നിവരെ കൂടാതെ ധരുണ്‍ അയ്യാസ്വാമിയും ജീവനും പുരുഷ ടീമില്‍ ഉള്‍പ്പെട്ടിട്ടുണ്ട്. ജിസ്‌ന മാത്യു, വി.കെ വിസ്മയ, എം.ആര്‍ പൂവമ്മ, രേവതി, സുഭ, വിത്യ എന്നിവരാണ് വനിതകള്‍ക്കായി ട്രാക്കിലിറങ്ങുന്നത്. ട്രാക്ക് രാജാക്കന്‍മാരായ അമേരിക്ക, ജമൈക്ക, ബ്രിട്ടന്‍ എന്നീ ടീമുകളുടെ കടുത്ത പോരാട്ടത്തെ മറികടക്കാനായാല്‍ ഇന്ത്യക്ക് ഒരു മെഡല്‍ ഉറപ്പ്. പുരുഷന്‍മാരില്‍ ട്രിനിഡാഡ് ആന്‍ഡ് ടുബാഗോയും വനിതകളില്‍ അമേരിക്കയുമാണ് ലണ്ടന്‍ ചാംപ്യന്‍ഷിപ്പിലെ ജേതാക്കള്‍. 

 

ടി. ഗോപി ഇന്നിറങ്ങും

പുരുഷ മാരത്തണില്‍ വയനാട്ടുകാരന്‍ തോന്നയ്ക്കല്‍ ഗോപിക്കും ഇന്ന് മത്സരമുണ്ട്. കഴിഞ്ഞ 2017ലെ ലണ്ടന്‍ ലോക ചാംപ്യന്‍ഷിപ്പില്‍ മത്സരിച്ചിരുന്നെങ്കിലും 28ാം സ്ഥാനത്തോടെ മത്സരം പൂര്‍ത്തിയാക്കേണ്ടി വന്നു. ഈ വര്‍ഷം മാര്‍ച്ചില്‍ കൊറിയയിലെ സോളില്‍ പൂര്‍ത്തിയാക്കിയ രണ്ട് മണിക്കൂര്‍ 13.39 സെക്കന്‍ഡാണ് വ്യക്തിഗത മികച്ച സമയം. 2016ലെ ഒളിംപിക്‌സില്‍ മത്സരിച്ചെങ്കിലും 25ാം സ്ഥാനം കൊണ്ട് മടങ്ങേണ്ടി വന്നു. ജാവലിന്‍ ത്രോ യോഗ്യതാ മത്സരത്തില്‍ ഇന്ത്യയുടെ മറ്റൊരു താരം ശിവപാല്‍ സിങും ഇന്നിറങ്ങുന്നുണ്ട്. 

 

യോഗ്യത നേടാതെ 

ജിന്‍സണ്‍

1500 മീറ്ററില്‍ ജിന്‍സണ്‍ ജോണ്‍സണ്‍ യോഗ്യതാ റൗണ്ട് മറികടക്കാനാകാതെ മടങ്ങി. യോഗ്യതാ റൗണ്ടില്‍ രണ്ടാം ഹീറ്റ്‌സില്‍ മത്സരിച്ച താരത്തിന് 10ാം സ്ഥാനമാണ് ലഭിച്ചത്. മൂന്ന് മിനുട്ട് 39.86 സെക്കന്‍ഡ് കൊണ്ടാണ് മത്സരം പൂര്‍ത്തിയാക്കിയത്. മൂന്ന് മിനുട്ട് 35.24 സെക്കന്‍ഡെന്ന തന്റെ മികച്ച സമയത്തിലെത്താന്‍ ജിന്‍സണ് കഴിഞ്ഞിരുന്നെങ്കില്‍ സെമിയിലെത്താമായിരുന്നു. പുരുഷ ഷോട്ട്പുട്ടില്‍ ഇന്ത്യയുടെ മറ്റൊരു പ്രതീക്ഷയായിരുന്ന തജീന്ദര്‍പാല്‍ സിങ്ങും യോഗ്യതാ റൗണ്ടില്‍ പുറത്തായി.