ജെയ്പൂര്‍: പൊലിസ് സ്റ്റേഷനില്‍ ലോക്കപ്പ് മുറിയില്ല, പിടികൂടുന്ന പ്രതികളെ സ്റ്റേഷനിലെ ഒരു മുറിയില്‍ സ്ഥാപിച്ച മരക്കുറ്റിയിലാണ് ബന്ധിക്കുക ! ഇത് രാജസ്ഥാനിലെ പാക് അതിര്‍ത്തിയോടു ചേര്‍ന്ന ശ്രീഗംഗാനഗര്‍ ജില്ലയിലെ റെയില്‍വെ പൊലിസ് സ്റ്റേഷനിലെ കാഴ്ചയാണ്. 33 വര്‍ഷം മുന്‍പുണ്ടാക്കിയതാണ് പൊലിസ് സ്റ്റേഷന്‍. കെട്ടിടത്തില്‍ പ്രതികള്‍ക്കായി ലോക്കപ്പ് മുറി ഉണ്ടാക്കാത്തതുകൊണ്ടാണ് ഒരു മുറിയില്‍ സ്ഥാപിച്ച മരക്കുറ്റിയില്‍ പിടിപ്പിച്ച ചങ്ങലയില്‍ പ്രതികളെ ബന്ധിക്കാറുള്ളത്.
മധ്യകാലഘട്ടത്തിലുള്ള പീഡന മുറയാണ് ഇതെന്നാരോപിച്ച് വിവാദവും തുടങ്ങിയിട്ടുണ്ട്. എന്നാല്‍ ലോക്കപ്പ് മുറിയില്ലാത്തതുകാരണം തങ്ങള്‍ക്കിതല്ലാതെ മറ്റെന്താണ് ചെയ്യാന്‍ കഴിയുകയെന്നാണ് സ്റ്റേഷന്‍ ഹൗസ് ഓഫിസര്‍ ധാനെ സിങ് ചോദിക്കുന്നത്.
മാത്രമല്ല, പിടികൂടുന്ന പ്രതികളെ കോടതിയില്‍ ഹാജരാക്കാന്‍ കൊണ്ടുപോകണമെങ്കില്‍ 200 കി.മീറ്റര്‍ ദൂരം സഞ്ചരിക്കണം. ലോക്കപ്പ് മുറികളില്ലാത്തതുകാരണം പിടിക്കപ്പെടുന്ന പ്രതികള്‍ക്ക് ജാമ്യം നല്‍കി വിട്ടയക്കുന്ന രീതിയാണിപ്പോഴെന്നും പൊലിസ് പറയുന്നു. പ്രതികളെ ചങ്ങലയില്‍ ബന്ധിക്കുകയെന്നത് ശരിയല്ല. എന്നാല്‍ ഇക്കാര്യത്തില്‍ തങ്ങള്‍ നിസഹായരാണ്. പൊലിസ് ഹെഡ് ക്വാര്‍ട്ടേഴ്‌സിലേക്ക് തങ്ങളുടെ ദുരിതം ചൂണ്ടിക്കാട്ടി നിവേദനങ്ങള്‍ നല്‍കിട്ടുണ്ടെങ്കിലും നടപടികള്‍ ഇതുവരെ ഉണ്ടായിട്ടില്ലെന്ന് പൊലിസുകാര്‍ പറയുന്നു.