വടക്കാഞ്ചേരി: നഗരസഭയില്‍ ഉള്‍പ്പെട്ട പെരിങ്ങണ്ടൂര്‍ മെഡിക്കല്‍ കോളജ് ഡിവിഷനുകളിലെ തെരുവ് വിളക്കുകള്‍ കണ്ണടച്ച് കിടക്കാന്‍ തുടങ്ങിയിട്ട് മാസങ്ങള്‍ പിന്നിട്ടിട്ടും കത്തിക്കാന്‍ നടപടി ഇല്ലാത്തതില്‍ പ്രതിഷേധം.
രാഷ്ട്രീയ വ്യക്തി താല്‍പര്യങ്ങള്‍ക്കനുസരിച്ച് മാത്രമാണ് വിളക്കുകള്‍ നന്നാക്കുന്നതെന്നും ബാക്കിയുള്ളവയെ നോക്കുകുത്തിയാക്കി മാറ്റുകയാണ് നഗരസഭ ചെയ്യുന്നതെന്നും ആരോപിച്ച് യൂത്ത് കോണ്‍ഗ്രസ് രംഗത്തെത്തി. ബൂത്ത് കമ്മിറ്റിയുടെ നേതൃത്വത്തില്‍ പോസ്റ്റുകളില്‍ തീപന്തം കൊളുത്തി പ്രതിഷേധിച്ചു. മെഡിക്കല്‍ കോളജിലേക്കുള്ള പ്രധാന വഴികളായ പെരിങ്ങണ്ടൂര്‍ കല്ലാറ്റുവളപ്പില്‍ റോഡ്, വാദ്യാര്‍മഠം റോഡ് തുടങ്ങിയ പ്രധാന വഴികളിലെ വഴിവിളക്കുകളിലാണ് പന്തം കൊളുത്തിയത്. കൗണ്‍സിലറോട് പരാതിപ്പെട്ടിട്ടും നടപടി സ്വീകരിക്കാത്ത അധികാരികളുടെ നിലപാടിനെതിരേയുള്ള പ്രതിഷേധത്തിന് യൂത്ത് കോണ്‍ഗ്രസ് ബൂത്ത് പ്രസിഡന്റ് സി.ജി അനീഷ്, സെക്രട്ടറി വി.ആര്‍ രഞ്ജിത്ത്, കോണ്‍ഗ്രസ് ബൂത്ത് പ്രസിഡന്റ് മനോജ് മേനോത്ത് നേതൃത്വം നല്‍കി.