കണ്ണൂര്‍: പൊതുവിദ്യാഭ്യാസ വകുപ്പ് സ്‌റ്റേറ്റ് ഇന്‍സ്റ്റിറ്റ്യൂട്ട് ഓഫ് എജ്യുക്കേഷണല്‍ ടെക്‌നോളജി എന്നിവരുമായി സഹകരിച്ച് കണ്ണൂര്‍ ശ്രീനാരായണ കോളജ് ഒന്‍പത്, 10, 11 തിയതികളിലായി ശാസ്ത്രം അറിയാന്‍ ടാലന്റ് ഹണ്ട് ശാസ്ത്ര ജാലകം സംഘടിപ്പിക്കും. ഒന്‍പതിന് കോളജ് സെമിനാര്‍ ഹാളില്‍ രാവിലെ 9.30 ന് മന്ത്രി ഡോ. കെ.ടി ജലീല്‍ ഉദ്ഘാടനം ചെയ്യും. 11 ന് ഉച്ചക്ക് 2.30ന് രാമചന്ദ്രന്‍ കടന്നപ്പള്ളി സമാപന സമ്മേളനം ഉദ്ഘാടനം ചെയ്യും. ജില്ലയില്‍ തെരഞ്ഞെടുക്കപ്പെട്ട 150 വിദ്യാര്‍ഥികളാണ് ശാസ്ത്ര ജാലകം ക്യാംപില്‍ പങ്കെടുക്കുക. വിവിധ സര്‍ക്കാര്‍, എയ്ഡഡ് വിദ്യാലയങ്ങളില്‍ പഠിക്കുന്ന ഒമ്പതാം തരത്തിലുള്ള ശാസ്ത്ര അഭിരുചിയുള്ള വിദ്യാര്‍ഥികള്‍ക്കാണ് അവസരം. മൂന്നുദിവസം നീളുന്ന പരിപാടിയില്‍ ഫിസിക്‌സ്, കെമിസ്ട്രി, ബയോളജി വിഷയങ്ങളിലായി ക്ലാസുകളിലെ പരീക്ഷണങ്ങളും നടത്തും. വാര്‍ത്താസമ്മേളനത്തില്‍ ഡോ. ശിവദാസന്‍ തിരുമംഗലത്ത്, ഡോ. എന്‍. സാജന്‍, അരയാക്കണ്ടി സന്തോഷ്, ടി.കെ രാജേന്ദ്രന്‍, എം.കെ വിനോദ് പങ്കെടുത്തു.