വിശാഖപട്ടണം: അവിശ്വസനീയമെന്നല്ലാതെ വേറെന്ത് പറയാന്‍. 10 മാസത്തെ ഇടവേളയ്ക്കു ശേഷം ടീമിലേക്ക് തിരിച്ചുവന്ന് രണ്ടാം ഇന്നിങ്‌സില്‍ തന്നെ 10ല്‍ ഏഴു വിക്കറ്റും സ്വന്തമാക്കിയ അശ്വിനും ഇനി അഭിമാനിക്കാം. ഒപ്പം തന്നെ ടെസ്റ്റില്‍നിന്ന് മാസങ്ങളോളം പുറത്താക്കിയ സെലക്ടര്‍ക്കുള്ള താക്കീതായും ഈ അസുലഭനേട്ടത്തെ വിനിയോഗിക്കാം.
അതേസമയം, സ്പിന്‍ ഇതിഹാസം ശ്രീലങ്കയുടെ മുത്തയ്യ മുരളീധരന്റെ റെക്കോര്‍ഡ് നേട്ടത്തിനൊപ്പമെത്താനുള്ള ശ്രമത്തിലാണ് താരമിപ്പോള്‍. ദക്ഷിണാഫ്രിക്കയ്‌ക്കെതിരേ രണ്ടാം ഇന്നിങ്‌സില്‍ ഒരു വിക്കറ്റ് കൂടി നേടിയാല്‍ ഏറ്റവും വേഗത്തില്‍ 350 ടെസ്റ്റ് വിക്കറ്റുകള്‍ തികയ്ക്കുന്ന താരമെന്ന മുത്തയ്യ മുരളീധരന്റെ നേട്ടത്തിനൊപ്പമെത്താന്‍ അശ്വിനാകും. തന്റെ 66ാം ടെസ്റ്റിലാണ് മുരളീധരന്‍ 350 വിക്കറ്റുകളെന്ന നാഴികക്കല്ല് പിന്നിട്ടതെങ്കില്‍ നിലവില്‍ അശ്വിനും തന്റെ 66ാം ടെസ്റ്റിലാണ് കളിക്കുന്നത്. വീഴ്ത്തിയതാവട്ടെ, 349 വിക്കറ്റുകളും.
നിലവിലെ ഫോംവച്ച് രണ്ടാം ഇന്നിങ്‌സില്‍ അശ്വിന്‍ ഈ നേട്ടം സ്വന്തമാക്കും. ഇതോടൊപ്പം ഏറ്റവും വേഗത്തില്‍ 350 ടെസ്റ്റ് വിക്കറ്റുകള്‍ തികയ്ക്കുന്ന ഇന്ത്യന്‍ താരമെന്ന റെക്കോര്‍ഡും അശ്വിന് സ്വന്തമാകും.
77 ടെസ്റ്റുകളില്‍നിന്ന് 350 വിക്കറ്റുകളെന്ന നേട്ടത്തിലെത്തിയ മുന്‍ താരവും പരിശീലകനുമായ അനില്‍ കുംബ്ലെയുടെ പേരിലാണ് നിലവിലെ ഇന്ത്യന്‍ റെക്കോര്‍ഡ്.
രണ്ടു വര്‍ഷത്തെ ഇടവേളയ്ക്കു ശേഷമാണ് അശ്വിന്‍ ടെസ്റ്റില്‍ അഞ്ചുവിക്കറ്റ് നേട്ടം സ്വന്തമാക്കുന്നത്. ടെസ്റ്റില്‍ താരത്തിന്റെ 27ാം അഞ്ചുവിക്കറ്റ് പ്രകടനമാണിത്. ഇന്ത്യന്‍ മണ്ണില്‍ ഇത് 21ാം തവണയും. ദക്ഷിണാഫ്രിക്കയ്‌ക്കെതിരേ അഞ്ചാം തവണയും നേട്ടം സ്വന്തമാക്കിയതോടെ ദക്ഷിണാഫ്രിക്കയ്‌ക്കെതിരേ കൂടുതല്‍ തവണ അഞ്ചുവിക്കറ്റുമായി താരം തന്നെ മുന്നില്‍.