ചങ്ങരംകുളം: പെര്‍മിറ്റില്‍ കൂടുതല്‍ വിദ്യാര്‍ഥികളെ കയറ്റി പോകുന്ന ഓട്ടോറിക്ഷകള്‍ക്കെതിരേയും ഫിറ്റ്‌നസ് സര്‍ടിഫിക്കറ്റ്, ഇന്‍ഷുറന്‍സ് ഇല്ലാതെ ഓടുന്ന വാഹനങ്ങള്‍ക്കെതിരേയും കര്‍ശന നടപടി  സ്വീകരിക്കുന്നുമെന്ന് ചങ്ങരംകുളം പ്രിന്‍സിപ്പല്‍ എസ്.ഐ കെ.പി മനേഷ് സുപ്രഭാതത്തോട് പറഞ്ഞു.  കഴിഞ്ഞ ദിവസം എടപ്പാള്‍, ചങ്ങരംകുളം എന്നിവിടങ്ങളില്‍ ഇത്തരത്തില്‍ വിദ്യാര്‍ഥികളെ കുത്തിനിറച്ചു  കൊണ്ടുപോകുന്ന ബസുകള്‍ പിടികൂടിയ സാഹചര്യത്തിലാണ് പുതിയ നടപടി.
പെണ്‍കുട്ടികള്‍ മാത്രമുള്ള  സ്‌കൂള്‍ വാഹനങ്ങളില്‍ സ്ത്രീജീവനക്കരുടെ സാന്നിധ്യം സ്‌കൂള്‍ അധികൃതര്‍ ഉറപ്പ്  വരുത്തേണ്ടതാണ്. സ്‌കൂള്‍ വാഹനങ്ങളുടെ അമിതവേഗതക്കെതിരേ കര്‍ശന നടപടി സ്വീകരിക്കും. മദ്യപിച്ചു വാഹനമോടിക്കുന്ന സ്‌കൂള്‍ ബസ് ഡ്രൈവര്‍മാര്‍ക്കെതിരേ കര്‍ശന നടപടി സ്വീകരിക്കും. എല്ലാ സ്‌കൂളുകളും ഡ്രൈവര്‍മാര്‍ക്ക് തിരിച്ചറിയല്‍ കാര്‍ഡ് ഉണ്ടെന്ന് സ്‌ക്കൂള്‍ അതികൃതര്‍ ഉറപ്പു  വരുത്തണം.
സ്റ്റേഷനില്‍ ഇനിയും രജിസ്റ്റര്‍ ചെയ്യാത്ത സ്‌കൂള്‍ ബസ് അല്ലാത്ത സ്‌കൂള്‍ കുട്ടികളെ  കയറ്റുന്ന വാഹനങ്ങള്‍ ഉടന്‍ പൊലിസ് സ്റ്റേഷനില്‍ രജിസ്റ്റര്‍ ചെയ്യണം. ഇനി മുതല്‍ എല്ലാ മാസവും അറ്റന്‍ഡന്‍സ്  പൊലിസ് പരിശോധിക്കുന്നതാണ്. സ്ഥിരമായി ക്ലാസില്‍ വരാത്ത കുട്ടികള്‍ പൊലിസിന്റെ നിരീക്ഷണത്തില്‍  ആയിരിക്കും. എല്ലാ ഇന്റര്‍നെറ്റ് കഫെകളിലും പ്രത്യേകിച്ച് സ്‌കൂളിന്റെ പരിസരത്ത് ഉള്ളവ ഇനി  പൊലിസിന്റെ നിരീക്ഷണ പരിധിയില്‍പ്പെടും.
കുട്ടികളുടെ സാന്നിധ്യം കണ്ടാല്‍ നടപടി സ്വീകരിക്കും. സ്‌കൂളിന്റെ 200 മീറ്റര്‍ ചുറ്റളവിലുള്ള കടകളില്‍ പുകയില ഉല്‍പന്നങ്ങള്‍ വില്‍ക്കുന്നത് ശ്രദ്ധയില്‍ പെട്ടാല്‍ കടകള്‍ക്കെതിരേ നടപടി സ്വീകരിക്കുമെന്നും എസ്.ഐ പറഞ്ഞു.