യോകോസുക: ജപ്പാനില്‍ ചരക്കുകപ്പലിടിച്ച് തകര്‍ന്ന യു.എസ് യുദ്ധക്കപ്പലിലുണ്ടായിരുന്ന ഏഴ് നാവികരുടെ മൃതദേഹങ്ങള്‍ കണ്ടെത്തി. അപകടത്തില്‍ തകര്‍ന്ന കപ്പലിന്റെ വെള്ളംകയറിയ ഭാഗത്താണ് ഇവരുടെ മൃതദേഹങ്ങള്‍ കണ്ടെത്തിയതെന്ന് യു.എസ് സെവന്‍ത് ഫഌറ്റ് പ്രസ്താവനയില്‍ അറിയിച്ചു. മിസൈല്‍ പ്രതിരോധ ശേഷിയുള്ള യു.എസ്.എസ് ഫിറ്റ്‌സ്‌ജെറാള്‍ഡ് ആണ് കഴിഞ്ഞ ദിവസം ഫിലിപ്പൈന്‍സ് ചരക്കുകപ്പലുമായി കൂട്ടിയിടിച്ചത്.
നാവികരുടെ മൃതദേഹങ്ങള്‍ യു.എസ് നാവിക ആശുപത്രിയിലേക്ക് മാറ്റി. മരിച്ചവരുടെ ബന്ധുക്കളെ വിവരം അറിയിച്ചിട്ടുണ്ടെന്ന് യു.എസ് സൈന്യം അറിയിച്ചു. ശനിയാഴ്ച ജപ്പാനിലെ യോകോസുകയ്ക്ക് തെക്ക് പടിഞ്ഞാറന്‍ ദിശയില്‍ 56 നോട്ടിക്കല്‍ മൈല്‍ അകലെവച്ചാണ് ഫിലിപ്പൈന്‍സ് ചരക്കുകപ്പലില്‍ പ്രാദേശികസമയം പുലര്‍ച്ചെ 2.30 നാണ് യുദ്ധക്കപ്പലിടിച്ചത്. പരുക്കേറ്റ മൂന്നുപേരെ യോകോസുകയിലെ യു.എസ് നാവിക ആശുപത്രിയിലേക്ക് മാറ്റിയിരുന്നു. ഷിപ്പ് കമാന്‍ഡിങ് ഓഫിസര്‍, കമാന്‍ഡര്‍ ബ്രെയ്‌സ് ബെന്‍സണ്‍ എന്നിവര്‍ക്കാണ് പരുക്കേറ്റത്. കഴിഞ്ഞ 13 നാണ് ബെന്‍സണ്‍ ചുമതലയേറ്റെടുത്തത്.
യു.എസ്, ജപ്പാനീസ് സൈനിക വിമാനങ്ങളും കപ്പലുകളും ഉപയോഗിച്ചാണ് കാണാതായ സൈനികര്‍ക്ക് വേണ്ടി തിരച്ചില്‍ നടത്തിയത്. ഇവര്‍ കടലില്‍ വീണിരിക്കാമെന്നായിരുന്നു നിഗനമം. സംഭവത്തില്‍ അന്വേഷണം നടക്കുന്നുണ്ടെന്നും അതിനുശേഷം നിയമനടപടികള്‍ തുടരുമെന്നും യു.എസ് സെവന്‍ത്ത് ഫഌറ്റ് വക്താവ് അറിയിച്ചു. യു.എസ് കപ്പലിന് കാര്യമായ നാശനഷ്ടമുണ്ട്. വാട്ടര്‍ലൈനിന് മുകളിലും താഴെയുമുള്ള സ്റ്റാര്‍ബോര്‍ഡിന് കേടുപാട് സംഭവിച്ചു. കപ്പലിലെ രണ്ട് ബ്രീത്തിങ് സ്‌പേസില്‍ വെള്ളംകയറുകയും ചെയ്തു.