ദോഹ: കുട്ടികള്‍ക്ക് ഏറ്റവും മികച്ച ജീവിതസാഹചര്യങ്ങള്‍ ലഭ്യമാക്കുന്ന അറബ് രാജ്യം ഖത്തര്‍. ആഗോളതലത്തില്‍ 34ാം സ്ഥാനവും ഖത്തര്‍ നേടി. സേവ് ദ ചില്‍ഡ്രന്‍ യു.എസ് എന്ന റിപ്പോര്‍ട്ടിലാണ് ഖത്തര്‍ അറബ് ലോകത്ത് ഒന്നാം സ്ഥാനം നേടിയത്. 172 രാജ്യങ്ങളാണ് പട്ടികയില്‍ ഇടംനേടിയത്. കുട്ടികളുടെ ജീവിതനിലവാരം ഉയര്‍ത്തുന്നതിന് ഖത്തര്‍ സ്വീകരിക്കുന്ന നടപടികളെക്കുറിച്ച് റിപ്പോര്‍ട്ടില്‍ വിശദീകരിക്കുന്നുണ്ട്.

അഞ്ച് വയസ്സില്‍ താഴെയുള്ള കുട്ടികളുടെ മരണനിരക്ക്, പോഷകാഹാര കുറവ്, സ്‌കൂളില്‍ പോകാന്‍ കഴിയാത്ത കുട്ടികള്‍, ബാലവേല, കൗമാര വിവാഹം, കൗമാര ജനന നിരക്ക്, സംഘര്‍ഷങ്ങളും കുട്ടികളുടെ കൊലപാതകവും മൂലമുള്ള കുടിയൊഴിപ്പിക്കല്‍ തുടങ്ങിയ എട്ട് വ്യത്യസ്ത ഘടകങ്ങള്‍ കൃത്യമായി വിലയിരുത്തുകയും താരതമ്യപഠനങ്ങള്‍ക്ക് വിധേയമാക്കിയുമാണ് റിപ്പോര്‍ട്ട് തയാറാക്കിയത്.

അറബ് ലോകത്ത് കുവൈത്താണ് രണ്ടാമത്. ആഗോളതലത്തില്‍ 38ാം സ്ഥാനമാണ് കുവൈത്തിന്. ഒമാന്‍(43), ലബനാന്‍, ടുണീഷ്യ(45), സഊദി അറേബ്യ(47), ജോര്‍ദാന്‍(51), മൊറോക്കോ(83), ഈജിപ്ത്(88) എന്നിങ്ങനെയാണ് തുടര്‍ുന്നുള്ള രാജ്യങ്ങള്‍ പട്ടികയില്‍ ഇടംനേടിയിരിക്കുന്നത്. ഏറ്റവും മികച്ച ജീവിതസാഹചര്യം നല്‍കുന്ന രാജ്യങ്ങളുടെ മുന്‍പന്തിയില്‍ നോര്‍വെയും സ്ലൊവേനിയയുമാണ്. ഫിന്‍ലാന്‍ഡ് രണ്ടാമതാണ്. നെതര്‍ലന്‍ഡ്, സ്വീഡന്‍, പോര്‍ച്ചുഗല്‍, അയര്‍ലന്‍ഡ്, ഐസ്‌ലന്‍ഡ്, ഇറ്റലി, ബെല്‍ജിയം, സൈപ്രസ്, ജര്‍മനി, ദക്ഷിണ കൊറിയ എന്നിവയാണ് തൊട്ടുപിന്നിലുള്ള രാജ്യങ്ങള്‍.

സംഘര്‍ഷങ്ങള്‍ കുട്ടികളെ ഏറ്റവും കൂടുതല്‍ ബാധിച്ച രാജ്യങ്ങളുടെ പട്ടികയില്‍ ഒന്നാം സ്ഥാനം സിറിയക്കാണ്. ദക്ഷിണ സുഡാന്‍, സൊമാലിയ, ഇറാഖ്, യമന്‍, സുഡാന്‍ എന്നിവയാണ് തൊട്ടുപിന്നില്‍. ആഗോള തലത്തില്‍ 2.8 കോടി കുട്ടികള്‍ നിര്‍ബന്ധപൂര്‍വം കുടിയൊഴിപ്പിക്കപ്പെടുന്നതായി റിപ്പോര്‍ട്ടില്‍ ചൂണ്ടിക്കാണിക്കപ്പെടുന്നു. ഇതില്‍ ഒരുകോടിയോളം കുട്ടികള്‍ അഭയാര്‍ഥികളും പത്ത് ലക്ഷത്തോളം കുട്ടികള്‍ അഭയസ്ഥാനം തേടുന്നവരും 1.7 കോടിയോളം കുട്ടികള്‍ സ്വദേശങ്ങളിലെ കലാപങ്ങളെ തുടര്‍ന്ന് വീട് നഷ്ടപ്പെട്ടവരുമാണ്. കുട്ടികള്‍ക്ക് ഏറ്റവും മോശം ജീവിതസാഹചര്യമുള്ള രാജ്യം നൈജറാണ്.