ബാലുശ്ശേരി: വിമുക്തഭടന്‍ അമ്പലപ്പൊയില്‍ സ്‌കൂളിനു സമീപം താമസിക്കുന്ന തെക്കേകളത്തിങ്കല്‍ ശ്രീരാഗം പി.കെ രാജീവ (56)നെ കുത്തിക്കൊന്ന കേസിലെ കൂട്ടു പ്രതിയെ ബാലുശ്ശേരി പൊലിസ് അറസ്റ്റ് ചെയ്തു. എഴുകുളം മണങ്ങാട്ട് പറമ്പത്ത് ആഷിഖ് (30) ആണ് അറസ്റ്റിലായത്.
കഴിഞ്ഞ മാസം 18 ന് ആയിരുന്നു രാജീവനെ അയല്‍വാസിയായ കൂടത്തും കണ്ടി അജയ് രാജ് മരക്കമ്പ് കൊണ്ട് തലയ്ക്കടിച്ചും കത്തികൊണ്ട് കുത്തിയും പരുക്കേല്‍പ്പിച്ചത്. വഴിത്തര്‍ക്കമായിരുന്നു അക്രമത്തിന് കാരണം. പ്രധാന പ്രതിയായ അജയ് രാജിനെ സംഭവ ദിവസം തന്നെ അറസ്റ്റ് ചെയ്തിരുന്നു. ഇയാള്‍ റിമാന്റില്‍ കഴിയുകയാണ്.
രണ്ടുപേര്‍ ചേര്‍ന്നാണ് തന്നെ അക്രമിച്ചതെന്ന് കൊല്ലപ്പെട്ട രാജീവന്‍ പൊലിസിന് മൊഴി നല്‍കിയിരുന്നു. ഇതിന്റെ അടിസ്ഥാനത്തില്‍ അജയ് രാജിന്റെ ഫോണ്‍ പരിശോധിച്ചപ്പോഴാണ് കൂട്ടു പ്രതിയായ ആഷിഖിനെ കുറിച്ച് പൊലിസിന് വിവരം ലഭിക്കുന്നത്. സുഹൃത്തുക്കളായ പ്രതികള്‍ ആസൂത്രണം ചെയ്ത് നടത്തിയതാണ് കൊലപാതകം.
പ്രതിയെ പൊലിസ് സംഭവസ്ഥലത്ത് കൊണ്ടുവന്ന് തെളിവെടുപ്പ് നടത്തി. രാജീവനെ കുത്താന്‍ ഉപയോഗിച്ച കത്തി പൊലിസ് കണ്ടെടുത്തു. പ്രതിയെ കോടതിയില്‍ ഹാജരാക്കി. സി.ഐ സുഷീര്‍, എ.എസ്.ഐമാരായ കെ.സി പൃഥ്വിരാജ്, എം. മധു, സി.പി.ഒമാരായ റിനീഷ്, ഗംഗേഷ്, സുരേഷ് ബാബു എന്നിവരാണ് പ്രതിയെ അറസ്റ്റ് ചെയ്തത്.