കൊട്ടാരക്കര: തേവലപ്പുറത്ത് ദമ്പതികള്‍ക്ക് നേരെ ആക്രമണം നടത്തിയ മൂന്ന് പേര്‍ അറസ്റ്റിലായി. ആലിന്‍കുന്നിന്‍പുറം ബിന്ദുഭവനില്‍ ബിനു(36), ഭാര്യ രാജി(32) എന്നിവര്‍ക്കാണ് പരുക്കേറ്റത്. ഇവരെ കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു. ഞായറാഴ്ച രാത്രി 9 മണിയോടെയായിരുന്നു ആക്രമണം.
സംഭവവുമായി ബന്ധപ്പെട്ട് പുത്തൂര്‍ പവിത്രേശ്വരം ഗായത്രിയില്‍ സുന്ദരേശന്‍(ബാബു55), മക്കള്‍ സൂരജ്(20), ഹരി(19) എന്നിവരെ പുത്തൂര്‍ പൊലിസ് അറസ്റ്റ് ചെയ്തു. പനിയെത്തുടര്‍ന്ന് പുത്തൂരിലെ സ്വകാര്യ ആശുപത്രിയില്‍ ചികിത്സയ്ക്ക് പോയ ശേഷം വീട്ടിലേക്ക് മടങ്ങുമ്പോഴായിരുന്നു ബിനുവിനും രാജിയ്ക്കും നേരെ ആക്രമണം നടന്നത്. സ്‌കൂട്ടറിലെത്തിയ ബിനുവും രാജിയും സമീപത്തെ വീട്ടില്‍ ഒരു കൂട്ടം ആളുകളെത്തി ബഹളം വയ്ക്കുന്നത് എന്തിനാണന്ന് തിരക്കിയപ്പോഴാണ് അക്രമികള്‍ ഇവര്‍ക്ക് നേരെ തിരിഞ്ഞത്. ബിനുവിനെ കൊടുവാള്‍ കൊണ്ട് തലയ്ക്ക് വെട്ടിയശേഷം മര്‍ദിച്ചു. അക്രമം തടയാന്‍ ശ്രമിക്കുമ്പോഴായിരുന്നു രാജിയെ കമ്പിവടി കൊണ്ടടിച്ചത്. നിലവിളികേട്ട് ഓടിക്കൂടിയ നാട്ടുകാരും സംഭവം അറിഞ്ഞെത്തിയ പൊലിസും ചേര്‍ന്നാണ് പ്രതികളെ കസ്റ്റഡിയിലെടുത്തത്.