കാബൂള്‍: താലിബാനുമായുള്ള സമാധാന ചര്‍ച്ചയില്‍ നിന്നു യു.എസ് പിന്മാറിയതിനു പിന്നാലെ രാജ്യത്ത് ഭീകരവാദി ആക്രമണങ്ങള്‍ വര്‍ധിക്കുന്നു.
ഇന്നലെ ഗസ്‌നി സര്‍വകലാശാലയിലെ ക്ലാസ്‌റൂമില്‍ നടന്ന സ്‌ഫോടനത്തില്‍ 12 പെണ്‍കുട്ടികളടക്കം 19 വിദ്യാര്‍ഥികള്‍ക്കു പരുക്കേറ്റു. ഇതില്‍ രണ്ടുപേരുടെ നില ഗുരുതരമാണ്.
കഴിഞ്ഞമാസം ഇതേ സര്‍വകലാശാലയുടെ മിനി ബസില്‍ സ്‌ഫോടനമുണ്ടായി ഡ്രൈവര്‍ കൊല്ലപ്പെട്ടിരുന്നു. തിങ്കളാഴ്ച ജലാലാബാദില്‍ അഫ്ഗാന്‍ സുരക്ഷാസേനയിലേക്കു പുതുതായി ചേരാന്‍ പോകുന്നവര്‍ യാത്രചെയ്ത മിനി ബസിലുണ്ടായ സ്‌ഫോടനത്തില്‍ 10 പേര്‍ മരിക്കുകയും 27 പേര്‍ക്കു പരുക്കേല്‍ക്കുകയും ചെയ്തിരുന്നു.
ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. താലിബാന്‍ ഇവിടെ ശക്തമാണെങ്കിലും സുരക്ഷാസേനയെയാണ് അവര്‍ കൂടുതലായി ഉന്നംവയ്ക്കുന്നത്.