ഉദുമ: ഉദുമ പഞ്ചായത്തിലെ അങ്കണവാടികളിലെ ചുമരുകളില്‍ വര്‍ണചിത്രങ്ങള്‍ തെളിയുന്നു. പിഞ്ചുകുട്ടികളെ അങ്കണവാടികളിലേക്ക് ആകര്‍ഷിക്കാന്‍ വേണ്ടി 2017-18 പദ്ധതിയില്‍ ഉള്‍പ്പെടുത്തിയാണ് സ്വന്തമായി കെട്ടിടമുള്ള 31 അങ്കണവാടികളില്‍ ജീവന്‍ തുടിക്കുന്ന ശിശു സൗഹൃദ ചുമര്‍ചിത്രങ്ങള്‍ വിരിഞ്ഞത്. ഈ ചിത്രങ്ങള്‍ കാണിച്ചാണ് പല അങ്കണവാടികളിലും ക്ലാസെടുക്കുന്നത്.
അഞ്ചു ലക്ഷത്തോളം രൂപയാണ് ചിത്രം വരക്കാന്‍ പഞ്ചായത്ത് ചെലവഴിച്ചതെന്ന് ക്ഷേമകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ സൈനബ അബൂബക്കര്‍ പറഞ്ഞു.
33 അങ്കണവാടികള്‍ക്ക് വാട്ടര്‍ പ്യൂരിഫെയറും വിവിധ അങ്കണവാടികള്‍ക്ക് അലമാര, ഫര്‍ണീച്ചര്‍, കുക്കര്‍, പാത്രങ്ങള്‍, 352 കിടക്കകള്‍ എന്നിവയും നല്‍കി.