അന്തിക്കാട്: പടിയംകാരാമാക്കലില്‍ 10 കുടുംബങ്ങള്‍ വെള്ളവും വെളിച്ചവുമില്ലാതെ ദുരിതത്തില്‍. കനാലി പുഴയോട് ചേര്‍ന്നു കിടക്കുന്ന പ്രദേശം അന്തിക്കാട് പഞ്ചായത്ത് 14-ാം വാര്‍ഡിലാണ്. കുടിവെള്ളത്തിനായി ജലഅതോറിറ്റി പൈപ്പുകളാണ് ഇവര്‍ ആശ്രയിക്കുന്നത്. എന്നാല്‍ പൈപ്പുകില്‍നിന്ന് വെള്ളം ലഭിച്ചിട്ട് ഒരാഴ്ചയിലേറെയായി.
പുഴ അടുത്തായതിനാല്‍ കിണറുകളില്‍ ഉപ്പുവെള്ളമാണ്. വീടുകളില്‍നിന്ന് റോഡിലെത്താന്‍ 200 മീറ്റിലേറെ ദൂരം നടക്കണം. വഴിയില്‍ നിറയെ പുല്ലു പടര്‍ന്ന് കാടുകയറിയ നിലയിലാണ്. ഇഴജന്തുക്കളുടെ ശല്യവും രൂക്ഷമാണ്.
വഴിവിളക്കുകള്‍ ഇല്ലാത്തതിനാല്‍ രാത്രിയില്‍ ജീവന്‍ പണയം വച്ചാണ് പ്രദേശവാസികള്‍ ഇതിലൂടെ പോകുന്നത്. പൊതുപ്രവര്‍ത്തകന്‍ അശ്വിന്‍ ആലപ്പുഴയുടെ നേതൃത്വത്തില്‍ പരിസരവാസികള്‍ പഞ്ചായത്ത് സെക്രട്ടറിക്ക് ഇതുസംബന്ധിച്ച് പരാതി നല്‍കിയിട്ടുണ്ട്.