പാരിസ്: ഇന്ത്യയില്‍ പുതിയ എഫ് 16 യുദ്ധവിമാനങ്ങള്‍ നിര്‍മിക്കാനുള്ള കരാറില്‍ അമേരിക്കന്‍ വ്യോമ/ പ്രതിരോധ നിര്‍മാണ കമ്പനിയായ ലാക്ഹീഡ് മാര്‍ട്ടിന്‍ ഇന്ത്യന്‍ കമ്പനിയായ ടാറ്റയുമായി കരാറില്‍ ഒപ്പുവച്ചു. ഇന്ത്യന്‍ വ്യോമസേനക്ക് നിലവില്‍ സ്വന്തമായുള്ള പഴയ യുദ്ധവിമാനങ്ങള്‍ക്ക് പകരമായാണ് പുതിയ വിമാനങ്ങള്‍. പാരിസില്‍ നടന്ന വ്യോമപ്രകടനത്തില്‍ വച്ചാണ് ഇരു കമ്പനികളും കരാര്‍ പ്രഖ്യാപിച്ചത്. വിദേശ വ്യവസായികള്‍ ഇന്ത്യന്‍ പങ്കാളികളുമായി ചേര്‍ന്ന് ഇന്ത്യയില്‍ വച്ചുതന്നെ യുദ്ധവിമാനങ്ങള്‍ നിര്‍മിക്കണം എന്ന മോദി സര്‍ക്കാരിന്റെ ആവശ്യം പരിഗണിച്ചാണ് ലാക്ഹീഡ് മാര്‍ട്ടിന്‍ ടെക്‌സസ്സിലെ ഫോര്‍ട്‌വര്‍ത്തിലുള്ള പ്ലാന്റ് ടാറ്റയുമായി ചേര്‍ന്ന് ഇന്ത്യയിലേക്ക് മാറ്റാന്‍ തീരുമാനിക്കുന്നത്.

മോദി സര്‍ക്കാരിന്റെ മെയ്ക്ക് ഇന്‍ ഇന്ത്യ നയവും അമേരിക്കന്‍ കമ്പനികള്‍ പുറംരാജ്യങ്ങള്‍ക്കു പകരം അമേരിക്കയില്‍ തന്നെ തൊഴില്‍ സാധ്യതകള്‍ സൃഷ്ടിക്കണം എന്ന ട്രംപിന്റെ അമേരിക്ക ഫസ്റ്റ് ക്യാംപയ്‌നും തമ്മിലുള്ള വൈരുധ്യം ഈ കരാറിനെ ബാധിക്കില്ലെന്നാണ് ഇരുകൂട്ടരും പറയുന്നത്. എഫ് 16 വിമാങ്ങളുടെ ഉത്പാദനം ഇന്ത്യയില്‍ തുടങ്ങുന്നതു വഴി വിമാനങ്ങളുടെ വിതരണാര്‍ഥം ആമേരിക്കയിലും ഉത്പാദനാര്‍ഥം ഇന്ത്യയിലും കൂടുതല്‍ തൊഴില്‍ സാധ്യതകള്‍ സൃഷ്ടിക്കപ്പെടും. മാത്രമല്ല സമഗ്രമായ യുദ്ധവിമാന ഉത്പാദന- വിതരണ മേഖലയില്‍ പ്രധാന സ്ഥാനം ഇന്ത്യയ്ക്ക് നേടാനും സാധിക്കും എന്നാണ് ഇരുവിഭാഗവും പറയുന്നത്.