കൊച്ചി: ജില്ലയില്‍ പനി ബാധിക്കുന്നവരുടെ എണ്ണം ഓരോ ദിവസവും വര്‍ധിക്കുന്നു. ഈ മാസം പനി പിടിച്ചു ചികിത്സ തേടിയത് 15120 പേരാണ്. ഡെങ്കിയും എലിപ്പനിയും ചിക്കുന്‍ഗുനിയയും മലേറിയയുമെല്ലാം ബാധിച്ചവരുടെ എണ്ണം ഓരോ ദിവസവും വര്‍ധിച്ചുവരുകയാണ്. 

ജില്ലയില്‍ ഈ വര്‍ഷം ഇതുവരെ പനി ബാധിച്ചത് 78200 പേര്‍ക്കാണ്. ഇതുവരെ ഡങ്കി ബാധിച്ചത് 1208 പേര്‍ക്കും. എച്ച്.വണ്‍, എന്‍.വണ്‍ ബാധിച്ചു അഞ്ചു പേര്‍ മരിച്ചു. ഡിഫ്തീരിയ ബാധിച്ചു ഒരാള്‍ മരിച്ചു. 44 പേര്‍ ഡിഫ്തീരിയ ലക്ഷണങ്ങളോടെ ആശുപത്രികളില്‍ പ്രവേശിപ്പിക്കപ്പെട്ടു. എട്ടുപേരുടെ രോഗം സ്ഥിരീകരിച്ചു. 160 പേര്‍ക്ക് ഡെങ്കി രോഗം കണ്ടെത്തി.
ഈ മാസം മാത്രം 423 പേര്‍ ഡെങ്കി ലക്ഷണങ്ങളോടെ ആശുപത്രികളില്‍ പ്രവേശിപ്പിച്ചു. 66 പേരില്‍ ഡെങ്കി കണ്ടെത്തി. 325 പേര്‍ക്ക് ഹെപ്പറ്റൈറ്റിസ് എയും 14 പേര്‍ക്ക് ഹെപ്പൈറ്റിസ് ബിയും ബാധിച്ചു. കഴിഞ്ഞ ആറുമാസത്തിനിടെ ജില്ലയില്‍ 16 പേര്‍ക്ക് മലേറിയ കണ്ടെത്തി. 119 പേര്‍ എലിപ്പനിക്ക് ചികിത്സ തേടി ആശുപത്രികളിലെത്തി. 51 പേരുടെ രോഗം സ്ഥിരീകരിച്ചു.
ഈ മാസം 16 പേരാണ് എലിപ്പനി ലക്ഷണങ്ങളോടെ ചികിത്സ തേടിയെത്തിയത്. നാലു പേരില്‍ എലിപ്പനി സ്ഥിരീകരിച്ചു. 17 പേര്‍ക്ക് മുണ്ടിനീരും 760 പേര്‍ക്ക് ചിക്കന്‍പോക്‌സും പിടിച്ചു. 14 പേര്‍ക്ക് അഞ്ചാംപനിയും ബാധിച്ചു. പകര്‍ച്ചപ്പനിക്കൊപ്പം ജില്ലയെ നേരിടുന്ന മറ്റൊരു പ്രശ്‌നമാണ് തെരുവുനായ ശല്യം. ഈ വര്‍ഷം ജില്ലയില്‍ 2818 പേര്‍ക്കാണു തെരുവുനായയുടെ കടിയേറ്റത്. ഈ മാസം 247 പേര്‍ക്ക് തെരുവു നായകളുടെ കടിയേറ്റു.
ശുചീകരണപ്രവര്‍ത്തനങ്ങള്‍ കൊച്ചി നഗരത്തിലടക്കം പൂര്‍ത്തീകരിക്കാത്തതും വെള്ളം കെട്ടിക്കിടക്കുന്നത് ഒഴിവാക്കാന്‍ കഴിയാത്തതും കൊതുകു പെരുകിയതും പകര്‍ച്ചവ്യാധികള്‍ വര്‍ധിക്കാന്‍ ഇടയാക്കി.