ശ്രീകൃഷ്ണപുരം: പുതിയ ഗ്രാമ ന്യായാലയത്തിനു എം.പി രാജേഷ് എം.പി ശിലയിട്ടു. ഗ്രാമീണ ജനതക്ക് ചെലവ് കുറഞ്ഞ നിലയിലും ഏറ്റവും വേഗത്തിലും പ്രദേശിക തലത്തിലും നീതിന്യായ സേവന സൗകര്യങ്ങള്‍ ഉറപ്പു വരുത്താന്‍ ലക്ഷ്യമിട്ടാണ് ഗ്രാമീണ കോടതികള്‍ ആരംഭിച്ചിരിക്കുന്നത്.
ഇതനുസരിച്ച് കേരളത്തിലാരംഭിച്ച 30 ഗ്രാമീണ കോടതികളില്‍ മൂന്നെണ്ണം പാലക്കാട് ജില്ലയിലായിരുന്നു. ഇതില്‍ ജില്ലയിലെ പ്രഥമ ഗ്രാമ ന്യായാലയ 2016 നവംബര്‍ അഞ്ചിന് ആരംഭിച്ചത് ശ്രീകൃഷ്ണപുരത്തായിരുന്നു. ശ്രീകൃഷ്ണപുരം ബ്ലോക്കിലെ പഴയ ഓഫിസ് കെട്ടിടത്തിലാണ് നിലവില്‍ ഗ്രാമ ന്യായാലയ പ്രവര്‍ത്തിച്ചുകൊണ്ടിരിക്കുന്നത്. ഒരു ന്യായാധികാരി ഉള്‍പ്പെടെ 12 പേരാണ് ജീവനക്കാരായിട്ടുള്ളത്. കഴിഞ്ഞ രണ്ടു വര്‍ഷത്തിനിടയില്‍ 1080 കേസുകള്‍ റജിസ്റ്റര്‍ ചെയ്യുകയും 991 കേസുകള്‍ തീര്‍പ്പാക്കുകയും ചെയ്തീട്ടുണ്ട്. ഗ്രാമ ന്യായാലയക്ക് സ്വന്തമായൊരു കെട്ടിടം വേണമെന്ന ആവശ്യത്തിന് 20 സെന്റ് സ്ഥലം ബ്ലോക്ക് പഞ്ചായത്ത് കോമ്പൗണ്ടില്‍അനുവദിച്ചിട്ടുണ്ട്. ഇവിടെ ഗ്രാമ ന്യായാലയക്ക് സ്വന്തമായൊരു ആസ്ഥാന മന്ദിരം നിര്‍മിക്കുന്നതിന് എം.പിയുടെ പ്രാദേശിക വികസന നിധിയില്‍ ഉള്‍പ്പെടുത്തി 45 ലക്ഷം രൂപ അനുവദിച്ചിരിക്കയാണ്. ശിലാസ്ഥാപന ചടങ്ങില്‍ ഒറ്റപ്പാലം എം.എല്‍.എ പി. ഉണ്ണി അധ്യക്ഷനായി, ഗ്രാമ ന്യായാലയ ന്യായാധികാരി കെ. കാര്‍ത്തിക ആമുഖ പ്രഭാഷണം നടത്തി,ബ്ലോക്ക് പഞ്ചായത്ത് പ്രസിഡന്റ് പി. അരവിന്ദാക്ഷന്‍, ഗ്രാമ പഞ്ചായത്ത് പ്രസിഡന്റുമാരായ സി.എന്‍ ഷാജു ശങ്കര്‍, കെ. ജയദേവന്‍, കെ.അംബുജാക്ഷി, ഷീബ പാട്ടത്തൊടി, ജില്ലാ പഞ്ചായത്തംഗം എം.കെ ദേവി, ജ്യോതി വാസന്‍, ഉഷാകുമാരി, ബാര്‍ അസോസിയേഷന്‍ സെക്രട്ടറി ജയപ്രകാശ്, എന്‍. ഹരിദാസന്‍, വി.പി ജയപ്രകാശ് കെ.രാമകൃഷ്ണന്‍ മാസ്റ്റര്‍, പി.എ തങ്ങള്‍, എന്‍. അബ്ദുള്‍ റഹ്മാന്‍, വി. വിശ്വനാഥന്‍, കെ. നിര്‍മ്മല, കെ.വിനോദ് കുമാര്‍ സംസാരിച്ചു.