കൊച്ചി: വായ്പ തിരിച്ചടവ് മുടങ്ങിയതിനെ തുടര്‍ന്ന് കൊച്ചിയില്‍ വിമാനം ജപ്തി ചെയ്തു. മലയാളികളായ രണ്ടു പൈലറ്റുമാര്‍ ചേര്‍ന്ന് വാങ്ങിയ സീപ്ലെയ്ന്‍ ആണ് ജപ്തി ചെയ്തത്. ആലുവ ഫെഡറല്‍ ബാങ്കിന്റേതാണ് അപൂര്‍വ്വ നടപടി.

ലക്ഷദ്വീപിലേക്ക് വിനോദസഞ്ചാര സാധ്യതകള്‍ മുന്‍ നിര്‍ത്തി 2014 ല്‍ അമേരിക്കയില്‍ നിന്നാണ് സീ പ്ലെയിന്‍ വാങ്ങിയത്. 13 കോടി രൂപയായിരുന്നു വിമാനത്തിന്റെ വില. വിമാനം വാങ്ങാനായി നാലു കോടി രൂപ ഫെഡറല്‍ ബാങ്കില്‍ നിന്ന് വായ്പയും എടുത്തു.

എന്നാല്‍ സര്‍വീസിനുള്ള അനുമതി ലഭിച്ചിരുന്നില്ല. ഇതേത്തുടര്‍ന്ന് വായ്പ തിരിച്ചടയ്ക്കാന്‍ കഴിയാതെയായി. ഇതോടെയാണ് ജപ്തി നടപടിയിലേക്ക് ബാങ്ക് നീങ്ങിയത്. ദേശീയ കമ്പനി ലോ ട്രിബ്യൂണല്‍ നിയോഗിച്ച ഉദ്യോഗസ്ഥനും ഫെഡറല്‍ ബാങ്ക് ഉദ്യോഗസ്ഥരും ചേര്‍ന്നാണ് നെടുമ്പാശേരി വിമാനത്താവളത്തില്‍ നിന്ന് വിമാനം ജപ്തി ചെയ്തത്.

പലിശയടക്കം ആറുകോടി രൂപ ബാങ്കിന് കിട്ടാനുണ്ട്. ഇന്‍സോള്‍വന്‍സി ആന്റ് ബാങ്ക് റപ്റ്റന്‍സി കോഡ് പ്രകാരമാണ് വിമാനം ജപ്തി ചെയ്തത്. ലേലത്തില്‍ വിമാനം ആരും വാങ്ങിയില്ലെങ്കില്‍ യുവാക്കള്‍ക്ക് വിമാനം വിറ്റ അമേരിക്കന്‍ കമ്പനിക്ക് തന്നെ വിമാനം തിരികെനല്‍കാനാണ് തീരുമാനം.