കരുളായി: സന്‍സദ് ആദര്‍ശ് ഗ്രാമ് യോജന പ്രകാരം മാതൃകാ ഗ്രാമമായി വികസിപ്പിക്കുന്ന കരുളായി പഞ്ചായത്തിന്റെ സമഗ്ര വികസനത്തിനുള്ള വില്ലേജ് ഡവലപ്‌മെന്റ് പ്ലാനിന് അംഗീകാരം. രാജ്യസഭാംഗം പി.വി അബ്ദുല്‍ വഹാബാണ് സന്‍സദ് പദ്ധതിയിലേക്ക് കരുളായിയെ നിര്‍ദേശിച്ചത്.
പഞ്ചായത്തില്‍ വിവിധ വകുപ്പുകള്‍ നടപ്പാക്കുന്ന പദ്ധതികള്‍ ജില്ലാ കലക്ടര്‍ എസ്. വെങ്കിടേശപതിയുടെ അധ്യക്ഷതയില്‍ ചേര്‍ന്ന  യോഗം വിശദമായി അവലോകനം ചെയ്തു.

പദ്ധതികള്‍ അടുത്ത വര്‍ഷം ഓഗസ്റ്റ് 31 നകം പൂര്‍ത്തിയാക്കുന്നതിന് ബന്ധപ്പെട്ട നടപടികള്‍ സ്വീകരിക്കണമെന്ന് കലക്ടര്‍ നിര്‍ദേശിച്ചു. യോഗത്തില്‍ പി.വി അബ്ദുല്‍ വഹാബ് എം.പി, കരുളായി പഞ്ചായത്ത് പ്രസിഡന്റ് വി.അസൈനാര്‍, വൈസ് പ്രസിഡന്റ് കെ. ശരീഫ, സ്ഥിരംസമിതി അധ്യക്ഷന്‍ കെ.മനോജ്, മറ്റു ജനപ്രതിനിധികള്‍, ദാരിദ്ര്യ ലഘൂകരണ വിഭാഗം അസി. പ്രോജക്ട് ഓഫീസര്‍ ടി.പി ഹൈദരലി, ജില്ലാ, പഞ്ചായത്ത്തല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.