മോസ്‌കോ: അഫ്ഗാനിസ്ഥാനിലെ സംഘര്‍ഷം അവസാനിപ്പിക്കാനുള്ള ചര്‍ച്ചയ്ക്കു റഷ്യയില്‍ തുടക്കം. താലിബാന്‍ നേതാക്കള്‍, അഫ്ഗാന്‍, പാകിസ്താന്‍, ഇന്ത്യ, യു.എസ് തുടങ്ങിയ രാജ്യങ്ങളിലെ പ്രതിനിധികള്‍ എന്നിവര്‍ ചര്‍ച്ചയില്‍ പങ്കെടുക്കുന്നുണ്ട്.
വ്യത്യസ്ത രാജ്യങ്ങള്‍ പങ്കെടുക്കുന്ന ചര്‍ച്ചയില്‍ ആദ്യമായാണ് താലിബാന്‍ പ്രതിനിധികള്‍ പങ്കെടുക്കുന്നത്. ഷേര്‍ മുഹമ്മദ് അബ്ബാസ് സ്റ്റാന്‍കിസിന്റെ നേതൃത്വത്തിലുള്ള താലിബാന്റെ അഞ്ചംഗ സംഘമാണ് ചര്‍ച്ചയില്‍ പങ്കെടുക്കുന്നത്. അഫ്ഗാന്‍ പീസ് കൗണ്‍സിലിനോടൊപ്പമുള്ള നേരിട്ടുള്ള ചര്‍ച്ചയില്‍ താലിബാന്‍ പ്രതിനിധികള്‍ പങ്കെടുക്കുന്നത് അഫ്ഗാനില്‍ സമാധാനം പുനഃസ്ഥാപിക്കാനുള്ള വഴിയൊരുക്കുമെന്നു റഷ്യന്‍ വിദേശകാര്യ മന്ത്രി സെര്‍ജി ലവ്‌റോവ് പറഞ്ഞു.
ഗൗരവവും ക്രിയാത്മകവുമായ ചര്‍ച്ചയാണ് ലക്ഷ്യമാക്കുന്നത്. സംയുക്ത ശ്രമത്തിലൂടെ അഫ്ഗാന്റെ ചരിത്രത്തില്‍ പുതിയ അധ്യായമാണ് രചിക്കാന്‍ പോകുന്നതെന്നും അദ്ദേഹം പറഞ്ഞു. താലിബാനുമായുള്ള ചര്‍ച്ചയ്ക്കു സെപ്റ്റംബറില്‍ റഷ്യ ശ്രമം നടത്തിയെങ്കിലും പരാജയപ്പെടുകയായിരുന്നു. താലിബാനുമായുള്ള നേരിട്ടുള്ള ചര്‍ച്ചയില്‍ ഇന്ത്യ ആദ്യമായാണ് പ്രതിനിധിയെ അയക്കുന്നത്. അഫ്ഗാനിസ്ഥാനിലെയും പാകിസ്താനിലെയും ഇന്ത്യന്‍ പ്രതിനിധിയായിരുന്ന അമര്‍ സിന്‍ഹയെയാണ് റഷ്യയിലേക്കയച്ചത്. അഫ്ഗാനില്‍ ഐക്യവും സുരക്ഷിതത്വവും ഉറപ്പാക്കുന്നതിനുള്ള എല്ലാവിധ ശ്രമങ്ങളെയും ഇന്ത്യ പിന്തുണയ്ക്കുമെന്നു വിദേശകാര്യ വക്താവ് രവീഷ് കുമാര്‍ പറഞ്ഞു.