കോഴിക്കോട്: പകര്‍ച്ചപ്പനി നിയന്ത്രണത്തിനും ചികിത്സക്കും ഫലപ്രദമായ മാര്‍ഗം ആയുര്‍വേദ ആശുപത്രികളില്‍ ലഭ്യമാണെന്ന് ജില്ലാ മെഡിക്കല്‍ ഓഫിസര്‍ (ആയുര്‍വേദം) ഡോ. ഒ.കെ ഷേര്‍ളി വാര്‍ത്താസമ്മേളനത്തില്‍ അറിയിച്ചു. പനി നിയന്ത്രിക്കുന്നതിനായി ഭാരതീയ ചികിത്സാ വകുപ്പിന്റെ നേതൃത്വത്തില്‍ ടാസ്‌ക് ഫോഴ്‌സ് പ്രവര്‍ത്തിക്കുന്നുണ്ട്. മുഴുവന്‍ തദ്ദേശ സ്ഥാപനങ്ങളെയും ചേര്‍ത്ത് എട്ട് സോണുകളായി തിരിച്ചാണ് ടാസ്‌ക് ഫോഴ്‌സിന്റെ പ്രവര്‍ത്തനം. 

കൊതുകിനെ ഉറവിടങ്ങളില്‍ നശിപ്പിക്കുക എന്നതാണ് ഡെങ്കിപോലുള്ള പനികള്‍ തടയുന്നതിനുള്ള ഫലപ്രദമായ മാര്‍ഗം. പരിസരം ശുചീകരിക്കുക, പാത്രങ്ങളിലും ഓടകളിലും കെട്ടിക്കിടക്കുന്ന വെള്ളം ഒഴിവാക്കുക, ഫോഗിങ് നടത്തുക.
പുകയില, സോപ്പുവെള്ളം ലായനി പരിസരങ്ങളില്‍ തളിക്കുക എന്നിവ കൊതുക് നശീകരണത്തിന് ഫലപ്രദമാണ്.
വേപ്പെണ്ണ, തുളസി, പച്ചകര്‍പ്പൂരം എന്നിവ വെളിച്ചെണ്ണയില്‍ ചേര്‍ത്ത് ദേഹത്ത് പുരട്ടുന്നത് കൊതുക് കടി ഏല്‍ക്കാതിരിക്കാന്‍ ഗുണം ചെയ്യും. കുടിക്കാനുള്ള തിളപ്പിച്ചാറിയ വെള്ളത്തില്‍ മുത്തങ്ങ, ചുക്ക്, മല്ലി എന്നിവയിലേതെങ്കിലും ഉപയോഗിക്കുന്നത് നല്ലതാണെന്നും ഇവര്‍ പറഞ്ഞു.
വാര്‍ത്താസമ്മേളനത്തില്‍ സംഘാടകസമിതി ഭാരവാഹികളായ ഡോ. മനോജ് കാളൂര്‍, ഡോ. ഷൈജു എന്നിവരും പങ്കെടുത്തു