കൊളത്തൂര്‍: വീട്ടുകാരേയും നാട്ടുകാരേയും ഭീതിയിലാക്കിയ മൂര്‍ഖന്‍ പാമ്പിനെ പിടികൂടി. കൊളത്തൂര്‍ പടിഞ്ഞാറേക്കുളമ്പിലെ നെടുംപറമ്പില്‍ കാര്‍ത്യായനിയുടെ വീട്ടില്‍ നിന്നാണ് ഒന്നര മീറ്ററിലേറെ നീളം വരുന്ന മൂര്‍ഖന്‍ പാമ്പിനെ വിഷവൈദ്യനും പരിസ്ഥിതി പ്രവര്‍ത്തകനുമായ കൈപ്പുറം അബ്ബാസ് പിടികൂടിയത്. കാര്‍ത്യായനിയുടെ വീട്ടിലെ മൂന്ന് പൂച്ചക്കുട്ടികളേയും വിഴുങ്ങി പത്തി വിടര്‍ത്തി നില്‍ക്കുന്നത് ശ്രദ്ധയില്‍പ്പെട്ട വീട്ടുകാര്‍ കൈപ്പുറം അബ്ബാസിനെ വിവരമറിയിക്കുകയായിരുന്നു.
സ്ഥലത്തെത്തിയ ഉടന്‍ അബ്ബാസ് പാമ്പിനെ വലയിലാക്കി. തുടര്‍ന്ന് പിടികൂടിയ പാമ്പുമായി നാട്ടുകാര്‍ക്കു മുന്നില്‍ പ്രദര്‍ശനവും, ക്ലാസുമെടുത്ത ശേഷമാണ് അബ്ബാസ് വീട്ടിലേക്ക് തിരിച്ചത്. പിടികൂടിയ മൂര്‍ഖന്‍ പാമ്പിനെ വനം വകുപ്പ് അധികൃതര്‍ക്ക് കൈമാറും.