മസ്‌കത്ത്: ഗള്‍ഫ് പ്രതിസന്ധിയുടെ പശ്ചാത്തലത്തില്‍ ഒമാനുമായി ഖത്തര്‍ വാണിജ്യബന്ധം ശക്തിപ്പെടുത്തുന്നു. ഇതിന്റെ ഭാഗമായി ഖത്തറില്‍ നിന്നുള്ള പ്രതിനിധി സംഘം ചൊവ്വാഴ്ച ഒമാനിലെത്തും.ഖത്തര്‍ ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രിയുടെ നേതൃത്വത്തില്‍ എഴുപതോളം ഖത്തര്‍ വ്യവസായികളടങ്ങുന്ന സംഘമാണ് ഒമാനിലെത്തുന്നത്. ഒമാനിലെ നിക്ഷേപ സാധ്യതകള്‍ തേടാനും ഇരുരാജ്യങ്ങളും തമ്മിലുള്ള സംയുക്ത പദ്ധതികള്‍ തുടങ്ങുന്നതിനും സന്ദര്‍ശനം സഹായിക്കുമെന്നാണ് പ്രതീക്ഷിക്കുന്നത്. വാണിജ്യ, നിക്ഷേപ മേഖലകളില്‍ ഒമാനുമായി സഹകരണം ശക്തിപ്പെടുത്തുകയാണ് സന്ദര്‍ശനത്തിന്റെ ലക്ഷ്യമെന്ന് ഖത്തര്‍ ചേംബര്‍ ചെയര്‍മാന്‍ ശൈഖ് ഖലീഫ ബിന്‍ ജാസിം ബിന്‍ മുഹമ്മദ് അല്‍താനി പറഞ്ഞു.