കൃഷ്ണഗിരി: അണ്ടര്‍ 16 വിജയ് മര്‍ച്ചന്റ് ട്രോഫിയില്‍ ജയം അനിവാര്യമായ കേരളം ഈമാസം 12ന് വീണ്ടും കളത്തിലിറങ്ങും. കൃഷ്ണഗിരി സ്റ്റേഡിയത്തില്‍ നടക്കുന്ന മത്സരത്തില്‍ പോണ്ടിച്ചേരിയാണ് കേരളത്തിന്റെ എതിരാളികള്‍. ഈമാസം 12 മുതല്‍ 14 വരെയാണ് മത്സരം. സൗത്ത് സോണില്‍ നിലവില്‍ രണ്ടു കളികളില്‍ നിന്ന് രണ്ടു പോയിന്റ് മാത്രമുള്ള കേരളം ആറാം സ്ഥാനത്താണ്. ഗ്രൂപ്പില്‍ മൂന്ന് കളികളില്‍ നിന്ന് ഒന്‍പത് പോയിന്റുമായി തമിഴ്‌നാടാണ് ഒന്നാം സ്ഥാനത്ത്. ഏഴും അഞ്ചും പോയിന്റുകളുമായി ആന്ധ്രയും കര്‍ണാടകയുമാണ് രണ്ടും മൂന്നും സ്ഥാനങ്ങളില്‍. കൃഷ്ണഗിരിയില്‍ നടന്ന കേരളം-ആന്ധ്ര മത്സരം സമനിലയില്‍ പിരിഞ്ഞതോടെ ഒന്നാം ഇന്നിങ്‌സ് ലീഡ് നേടിയ ആന്ധ്രക്ക് മൂന്നു പോയിന്റ് ലഭിച്ചിരുന്നു. തമിഴ്‌നാടുമായുള്ള രണ്ടാം മത്സരത്തിലും ഒന്നാം ഇന്നിങ്‌സ്് ലീഡ് വഴങ്ങിയതോടെ ഗ്രൂപ്പില്‍ കേരളത്തിന്റെ നില പരുങ്ങലിലാണ്. തമിഴ്‌നാടിനെതിരേ ബാറ്റിങ്ങിലും ബൗളിങ്ങിലും തിളങ്ങിയ അനന്തകൃഷ്ണന്റെ പ്രകടനമാണ് കേരളത്തിന് ആകെയുള്ള ആശ്വാസം. സെഞ്ചുറി (116) നേടിയ അനന്തകൃഷ്ണന്‍ തമിഴ്‌നാടിന്റെ നാലു വിക്കറ്റുകളും നേടിയിരുന്നു. വിജയം തേടിയാണ് പോണ്ടിച്ചേരിക്കെതിരേ കേരളം കളത്തിലിറങ്ങുന്നത്. മൂന്നാം മത്സരത്തിന് മുന്നോടിയായി വ്യാഴാഴ്ച മുതല്‍ കേരള ടീം കോച്ച് രാജഗോപാല്‍, മുന്‍ കേരള ടീം നായകന്‍ സോണി ചെറുവത്തൂര്‍ എന്നിവരുടെ നേതൃത്വത്തില്‍ പരിശീലനം ആരംഭിച്ചിട്ടുണ്ട്. ഗ്രൂപ്പിലെ കേരളത്തിന്റെ അടുത്ത മത്സരവും കൃഷ്ണഗിരിയിലാണ്. നവംബര്‍ 18ന് തുടങ്ങുന്ന മത്സരത്തില്‍ ഗോവയാണ് എതിരാളികള്‍. അവസാന ഗ്രൂപ്പ് മത്സരത്തില്‍ ഹൈദരാബാദിനെയാണ് കേരളം നേരിടേണ്ടത്.
ഹൈദരാബാദ് എന്‍.എഫ്.സി ഗ്രൗണ്ടിലാണ് ഈ മത്സരം. വരാനിരിക്കുന്ന മത്സരങ്ങലില്‍ മികച്ച പ്രകടനം നടത്തിയാല്‍ മാത്രമേ കേരളത്തിന് നോക്കൗട്ട് ഘട്ടത്തിലേക്ക് കടക്കാന്‍ കഴിയൂ.