സോചി: യുവ നിരയുമായെത്തിയ ലോക ചാംപ്യന്‍മാരായ ജര്‍മനി കോണ്‍ഫെഡറേഷന്‍സ് കപ്പില്‍ വിജയത്തുടക്കമിട്ടു. ഏഷ്യന്‍ കരുത്തരായ ആസ്‌ത്രേലിയയെ ജര്‍മനി രണ്ടിനെതിരേ മൂന്ന് ഗോളുകള്‍ക്ക് പരാജയപ്പെടുത്തി. ജര്‍മനിക്കായി സ്റ്റിന്‍ഡ്, നായകന്‍ ജൂലിയര്‍ ഡ്രാക്‌സലര്‍, ഗൊരെറ്റ്‌സ്‌ക എന്നിവര്‍ വല ചലിപ്പിച്ചു. ആസ്‌ത്രേലിയയുടെ ഗോളുകള്‍ റോജിക്ക്, ജുറിക്ക് എന്നിവരുടെ വകയായിരുന്നു. ജര്‍മനിക്കെതിരേ ആസ്‌ത്രേലിയ പൊരുതിയാണ് പരാജയം സമ്മതിച്ചത്.
കളിയുടെ അഞ്ചാം മിനുട്ടില്‍ തന്നെ ഗോള്‍ നേടി ജര്‍മനി ആധിപത്യം സ്ഥാപിച്ചെങ്കിലും ആസ്‌ത്രേലിയ മത്സരത്തിലേക്ക് തിരിച്ചെത്തുകയായിരുന്നു. മധ്യനിരയ്ക്ക് പ്രാധാന്യം നല്‍കി ഒരു സ്‌ട്രൈക്കറെ മുന്‍നിര്‍ത്തി 4-5-1 ശൈലിയിലാണ് ജോക്വിം ലോ ജര്‍മന്‍ നിരയെ അണിനിരത്തിയത്.
ആസ്‌ത്രേലിയ 3-6-1 ശൈലിയാണ് സ്വീകരിച്ചത്. കളി തുടങ്ങി അഞ്ചാം മിനുട്ടില്‍ ജൂലിയന്‍ ബ്രാന്‍ഡിന്റെ അസിസ്റ്റില്‍ ലാറസ് സ്റ്റിന്‍ഡ് ലോക ചാംപ്യന്‍മാര്‍ക്ക് ലീഡൊരുക്കി. എന്നാല്‍ പതിയെ മത്സരത്തിലേക്ക് തിരിച്ചെത്തിയ ആസ്‌ത്രേലിയ 41ാം മിനുട്ടില്‍ ടോം റോജിക്കിലൂടെ സമനില കണ്ടെത്തി. ആദ്യ പകുതി അവസാനിക്കാന്‍ നിമിഷങ്ങള്‍ മാത്രമുള്ളപ്പോള്‍ ലഭിച്ച പെനാല്‍റ്റി വലയിലെത്തിച്ച് നായകന്‍ ഡ്രാക്‌സലര്‍ ജര്‍മനിയെ വീണ്ടും മുന്നിലെത്തിച്ചു.
രണ്ടാം പകുതി തുടങ്ങി മത്സരം നാല് മിനുട്ട് പിന്നിട്ടപ്പോള്‍ ഗൊരെറ്റ്‌സകയിലൂടെ ജര്‍മനി മൂന്നാം ഗോള്‍ നേടി ലീഡുയര്‍ത്തി. ജോഷ്വ കിമ്മിചാണ് ഗോളിന് വഴിയൊരുക്കിയത്. മൂന്ന് ഗോള്‍ വഴങ്ങിയിട്ടും തളരാതെ കളിച്ച ആസ്‌ത്രേലിയ 56ാം മിനുട്ടില്‍ രണ്ടാം ഗോള്‍ മടക്കി.
ടോമി ജുറിക്കാണ് ആസ്‌ത്രേലിയക്ക് രണ്ടാം ഗോള്‍ സമ്മാനിച്ചത്. സമനിലയ്ക്കായി ആസ്‌ത്രേലിയ കിണഞ്ഞു ശ്രമിച്ചെങ്കിലും ഗോള്‍ വഴങ്ങാതെ ജര്‍മനി മത്സരം 3-2ന് സ്വന്തമാക്കി.
ഈ മാസം 22ന് നടക്കുന്ന മത്സരത്തില്‍ ആസ്‌ത്രേലിയ കാമറൂണുമായും ജര്‍മനി ചിലിയുമായും ഏറ്റുമുട്ടും.