മലപ്പുറം:മുന്‍ രാഷ്ട്രപതി കെ. ആര്‍. നാരായണന്റെ പേരില്‍ സ്റ്റാമ്പ് പുറത്തിറക്കണമെന്ന ആവശ്യവുമായി യുവാവിന്റെ ഒറ്റയാന്‍ സമരം.
പൊന്‍മുണ്ടം സ്റ്റേജ്പ്പടി സ്വദേശിയും, പരേതനായ പുതുക്കുടി സൈദ്മുഹമ്മദ്, ആയിഷാബി ദബ്ബദികളുടെ മകനും മലയാളി കലക്ടേഴ്‌സ് മെമ്പറുമായ ഷാഫി പൊന്‍മുണ്ടമാണ് ആ ആവശ്യവുമായി വര്‍ഷങ്ങളായി ഒറ്റയാന്‍ പോരാട്ടം നടത്തുന്നത്. രാഷ്ടപതിയെന്ന നിലയില്‍ മലയാളികള്‍ക്കിടയില്‍ അഭിമാനകരമായ ഇടപെടല്‍ നടത്തിയ കെ.ആര്‍ നാരായണന്‍ അന്തരിച്ചട്ട് നവംബര്‍ ഒന്‍പതിന് 13 വര്‍ഷം തികയുകയാണ്. 2014 നവംബര്‍ 19,20 തിയതികളില്‍ മലപ്പുറം കോട്ടക്കുന്നില്‍ തപാല്‍ വകുപ്പ് ഒരുക്കിയ പരിപാടിയില്‍ വെച്ചാണ് പൊതു പ്രവര്‍ത്തകനായ ഷാഫി ആദ്യമായി ഈ ആവശ്യം ഉന്നയിച്ച് ഒപ്പ് ശേഖരണം ആരംഭിച്ചത്. തുടര്‍ന്ന് 2014 നവംബര്‍ 26 മുതല്‍ 30 വരെ തിരൂരിവെച്ച് നടന്ന കേരള സംസ്ഥാന സ്‌കൂള്‍ ശാസ്‌ത്രോത്സവത്തിലും 2015 ജനുവരിയില്‍ കോഴിക്കോട് വെച്ച് നടന്ന 55 ആമത് കേരളാ സംസ്ഥാന സ്‌കൂള്‍ കലോത്സവ വേദിയിലും തുടര്‍ പ്രവര്‍ത്തനം നടത്തി.
ഫിലാറ്റലിക് എക്‌സിബിറ്റര്‍ കൂടിയായ ഇദ്ധേഹത്തിന് മുന്‍ മന്ത്രി എ.പി അനില്‍കുമാര്‍, മുന്‍ എം.പി അബ്ദുസമദ് സമദാനി തുടങ്ങിയവര്‍ നേരിട്ട് പിന്തുണ അറിയിച്ചിട്ടുണ്ട്്. വര്‍ഷങ്ങള്‍ പിന്നിട്ടെങ്കിലും വൈകിയെങ്കിലും തന്റെ ആവശ്യം പരിഗണിക്കണമെന്നാണ് ഷാഫിയുടെ ആവശ്യം. ഇതിനായി വിശ്രമമില്ലാത്ത പ്രവര്‍ത്തനത്തിലാണ് ഷാഫി ഇപ്പോഴും.