വാണിമേല്‍: യു.പി.എസ്.സി നടത്തുന്ന ഇന്ത്യന്‍ എഞ്ചിനിയറിംഗ് സര്‍വ്വീസ് എക്‌സാമില്‍ ഉന്നത വിജയവുമായി മലയാളി. കോഴിക്കോട് ജില്ലയിലെ വാണിമേല്‍ സ്വദേശിയായ ചാലുപറമ്പത്ത് ഷാനവാസാണ് മലയാളികള്‍ക്ക് അഭിമാനമായത്.

ഇന്ത്യയിലെ എഞ്ചിനിയര്‍മാരുടെ മോഹ പരീക്ഷയായ ഐ ഇ എസില്‍ ഒമ്പതാം റാങ്ക് നേടിയാണ് ഷാനവാസ് ശ്രദ്ധേയനായത്.
സിവില്‍, മെക്കാനിക്കല്‍, ഇലക്ട്രോണിക്കല്‍, ഇലക്ട്രോണിക്‌സ് ആന്റ് കമ്മ്യൂണിക്കേഷന്‍ വിഭാഗം എഞ്ചിനിയര്‍ മാര്‍ക്കിടയില്‍ നടത്തുന്ന ഈ പരീക്ഷ അതീവ കഠിനമാണ്. കഠിനാധ്വാനവും സന്നദ്ധതയും പ്രതിഭാ വിലാസവുമുള്ള പരീക്ഷാര്‍ത്ഥികള്‍ക്ക് മാത്രം വിജയിക്കാവുന്ന പരീക്ഷയാണിത്.

വാണിമേല്‍ ക്രസന്റ് ഹൈസ്‌കൂളില്‍ നിന്ന് 2006 ല്‍ മികച്ച ഗ്രേഡോടെ എസ്.എസ്.എല്‍.സി യും പേരോട് ഹയര്‍ സെക്കണ്ടറിയില്‍ നിന്ന് പ്ലസ് ടു വും പൂര്‍ത്തിയാക്കിയ ഷാനവാസ് കേരള എഞ്ചിനിയറിംഗ് എന്‍ട്രന്‍സ് എക്‌സാമില്‍ 49ാം റാങ്കും നേടി. അഖിലേന്ത്യ എഞ്ചിനിയറിംഗ് എന്‍ട്രന്‍സില്‍ ഉന്നത റാങ്കോടെ കാലിക്കറ്റ് എന്‍ ഐ ടി യില്‍ പ്രവേശനം നേടുകയും ചെയ്തു. അവിടുന്ന് ഇലക്ട്രോണിക്‌സ് ആന്റ് കമ്മ്യൂണിക്കേഷന്‍ സ്ട്രീമില്‍ ബിടെക്ക് പഠനം പൂര്‍ത്തിയാക്കുകയും ചെന്നൈയിലെ കോഗ്‌നിസന്റ് സോഫ്റ്റ് വെയര്‍ കമ്പനിയില്‍ ജോലിയില്‍ പ്രവേശിക്കുകയും ചെയ്തു.

വിജയ മോഹവും വിത്യസ്തമായ വഴിയിലെ സഞ്ചാരവും വലിയ സ്വപ്നങ്ങളും ചെന്നൈയില്‍ നിന്ന് റിസൈന്‍ ചെയ്യുന്നതില്‍ ഷാനവാസിനെ എത്തിച്ചു.തുടര്‍ന്ന് ഹൈദരാബാദിലെ ACE അക്കാദമിയില്‍ ഐ ഇ സ്, ഗൈറ്റ് പരീക്ഷകള്‍ക്കായി ഒരു വര്‍ഷത്തെ പരിശീലനം നേടി. അഖിലേന്ത്യേ ഗൈറ്റ് പരീക്ഷയില്‍ മുപ്പത്തിരണ്ടാം റാങ്ക് നേടി ഒ എന്‍ ജി സി മുംബൈയില്‍ ചേര്‍ന്ന് പ്രവര്‍ത്തിക്കുന്നതിനിടെയാണ് നാട്ടുംപുറത്ത് കാരനായ ഈ മിടുക്കന്‍ ഐ ഇ എസ് എക്‌സാമില്‍ ഉന്നത റാങ്ക് നേടി മലയാളികള്‍ക്ക് അഭിമാനമായത്.

വാണിമേല്‍ പൊന്നാണ്ടി അന്ത്രുവിന്റേയും ചെറുമോത്ത് കാരപ്പറമ്പത്ത് നസീമയുടേയം മകനാണ്.മുഹമ്മദ് ശഹീന്‍ അക്തര്‍, നിസാന നസ്‌റിന്‍ സഹോദരങ്ങളാണ്.