കൊച്ചി: വിവാഹാഭ്യര്‍ഥന നിരസിച്ച യുവതിയെ കഴുത്തറുത്ത് കൊല്ലാന്‍ ശ്രമിച്ച യുവാവ് അറസ്റ്റില്‍. കൊച്ചി നഗരത്തില്‍ രാവിലെ ആറരയോടെയാണ് സംഭവം. ഗുരുതരമായി പരുക്കേറ്റ യുവതിയെ സ്വകാര്യ ആശുപത്രിയില്‍ പ്രവേശിപ്പിച്ചു.
യുവതി അപകടനില തരണം ചെയ്തു. ആക്രമണം നടത്തിയശേഷം ബൈക്കില്‍ രക്ഷപ്പെട്ട കോതമംഗലം നെല്ലിമറ്റം പുത്തന്‍പുരയ്ക്കല്‍ രവിയുടെ മകന്‍ ശ്യാമിനെ (28) പൊലിസ് മൂവാറ്റുപുഴയില്‍നിന്ന് പിടികൂടി. ഇയാളെ കോടതിയില്‍ ഹാജരാക്കി റിമാന്‍ഡ്‌ചെയ്തു. കലൂര്‍, ദേശാഭിമാനി -കറുകപ്പള്ളി റോഡില്‍ കൈരളി സ്ട്രീറ്റിനു സമീപമാണ് സംഭവം. കൊച്ചിയിലെ സ്വകാര്യ ലബോറട്ടറിയിലെ ജീവനക്കാരിയാണ് കോതമംഗലം സ്വദേശിനിയായ യുവതി. എറണാകുളത്ത് ഹോസ്റ്റലില്‍ താമസിക്കുകയാണിവര്‍.
ജോലിസ്ഥലത്ത് ഓട്ടോറിക്ഷയില്‍ വന്നിറങ്ങുമ്പോള്‍ ബൈക്കില്‍ പിന്തുടര്‍ന്നുവന്ന ശ്യാം പിടിച്ചുനിര്‍ത്തി കത്തികൊണ്ട് കഴുത്ത് മുറിക്കുകയായിരുന്നുവെന്ന് പൊലിസ് പറഞ്ഞു. യുവതിയുടെ കഴുത്തിലും ഇടത് തോളിലും നടുവിനും ഇടതു തുടയിലും ആഴത്തില്‍ മുറിവേറ്റു. ബഹളം കേട്ട് നാട്ടുകാര്‍ ഓടിയെത്തിയപ്പോഴേക്കും യുവാവ് ബൈക്കില്‍ രക്ഷപ്പെട്ടു.
ഇരുവരും നേരത്തെ പരിചയക്കാരാണെന്ന് പൊലിസ് പറഞ്ഞു. പെയിന്റിങ് ജോലിക്കാരനാണ് ശ്യാം.
പെണ്‍കുട്ടിയോട് ഇയാള്‍ വിവാഹാഭ്യര്‍ഥന നടത്തിയിരുന്നു. വീട്ടില്‍ വിവാഹാലോചനയുമായെത്തിയെങ്കലും വീട്ടുകാരും ഇത് നിരസിച്ചു. ഇതിലുള്ള വൈരാഗ്യമാണ് വധശ്രമത്തില്‍ കലാശിച്ചത്.