ദുബൈ: അടുത്ത ചാംപ്യന്‍സ് ട്രോഫി പോരാട്ടം 2021ല്‍ നടത്താന്‍ ഐ.സി.സി തീരുമാനം. ഇന്ത്യയില്‍ വച്ചാകും ടൂര്‍ണമെന്റ് അരങ്ങേറുക. ലോക ടെസ്റ്റ് ചാംപ്യന്‍ഷിപ്പ് നടത്താനുള്ള ആലോചനകള്‍ക്കും അന്താരാഷ്ട്ര ക്രിക്കറ്റ് കമ്മിറ്റി തുടക്കമിട്ടിട്ടുണ്ട്. ഇതുസംബന്ധിച്ച് അന്തിമ തീരുമാനം കൈക്കൊണ്ടിടില്ല.
അതേസമയം അടുത്ത വര്‍ഷം നടത്താനിരുന്ന ടി20 ലോകകപ്പ് ക്രിക്കറ്റ് 2020ലേക്ക് മാറ്റിയേക്കും. മത്സരങ്ങളുടെ ആധിക്യത്തെ തുടര്‍ന്നാണ് ലോകകപ്പ് മാറ്റാന്‍ ഐ.സി.സി പദ്ധതിയിടുന്നത്. ഇതുസംബന്ധിച്ച അന്തിമ തീരുമാനം അടുത്ത ദിവസങ്ങളില്‍ തന്നെയുണ്ടാകും. 2018ലെ ലോകകപ്പ് മാറ്റി വയ്ക്കാന്‍ തീരുമാനിച്ചിട്ടുണ്ട്. ഐ.സി.സിയില്‍ അംഗങ്ങളായ മിക്ക ടീമുകളും അടുത്ത വര്‍ഷം പര്യടനങ്ങളും പരമ്പരകളുമായി തിരക്കിലാണെന്നതാണ് ലോകകപ്പ് മാറ്റി വയ്ക്കാനുള്ള പ്രധാന കാരണമെന്ന് ഒരു ഐ.സി.സി വക്താവ് പറഞ്ഞു. ഒപ്പം ഐ.സി.സിയുടെ നിരവധി മത്സരങ്ങളും നടക്കാനിരിക്കുന്നുണ്ട്.
2020ല്‍ നടത്താനാണ് ഇപ്പോള്‍ ആലോചനയിലുള്ളത്. ദക്ഷിണാഫ്രിക്ക, ആസ്‌ത്രേലിയ എന്നിവടങ്ങളിലൊന്ന് ലോക മാമാങ്കത്തിന് വേദിയാകുമെന്നും അദ്ദേഹം കൂട്ടിച്ചേര്‍ത്തു. മിക്ക രാജ്യങ്ങളിലും ടി20 ലീഗുകള്‍ അരങ്ങേറുന്നതിനാല്‍ ടി20 ലോകകപ്പിന്റെ പ്രസക്തി സംബന്ധിച്ചും ഐ.സി.സി ഗഹനമായി ചിന്തിക്കുന്നുണ്ട്.