മോസ്‌കോ: സ്വര്‍ണത്തിലേക്കുള്ള ജൈത്രയാത്ര പൂര്‍ത്തിയാക്കാനാകാതെ ഇന്ത്യന്‍ താരം മേരി കോം. സെമി ഫൈനലില്‍ പുറത്തായതോടെ മേരിക്ക് വെങ്കലം കൊണ്ട് തൃപ്തിപ്പെടേണ്ടി വന്നു. തുര്‍ക്കി താരം ബുസേനാസ് കാക്കിറോഗുലനോടാണ് പരാജയപ്പെട്ടത്. ഏറ്റവും മികച്ച പ്രകടനം പുറത്തെടുത്തെങ്കിലും നിര്‍ഭാഗ്യം കൊണ്ടാണ് മേരി കോം പരാജയപ്പെട്ടത്.
4-1നാണ് യൂറോപ്യന്‍ ചാംപ്യനും രണ്ട@ാം സീഡുമായ ബുസേനാസ് ജയിച്ചു കയറിയത്. തോറ്റെങ്കിലും രാജ്യത്തിനായി എട്ടാമത്തെ ലോക ചാംപ്യന്‍ഷിപ്പ് മെഡലുമായാണ് മേരി മടങ്ങുക. തുടക്കത്തില്‍ മേരി പതറിയെങ്കിലും പിന്നീട് പിടിച്ച് നില്‍ക്കുകയായിരുന്നു. മിന്നലാക്രമണങ്ങളിലൂടെ തിരിച്ചടിച്ച മേരി ഒപ്പത്തിനൊപ്പമുള്ള പ്രകടനമാണ് കാഴ്ചവച്ചതെങ്കിലും ജയം സ്വന്തമാക്കാനായില്ല.
അതേസമയം, മഞ്ജു റാണി ഫൈനലില്‍ പ്രവേശിച്ചു. മറ്റൊരു മെഡല്‍ പ്രതീക്ഷയായിരുന്ന യമുന ബോറോക്ക് സെമിയില്‍ പുറത്തായി വെങ്കലം കൊണ്ട് തൃപതിപ്പെടേണ്ടി വന്നു. അരങ്ങേറ്റത്തില്‍ തന്നെ ഫൈനലില്‍ പ്രവേശിച്ചതിന്റെ ആഹ്ലാദത്തിലാണ് മഞ്ജു. 48 കില വിഭാഗത്തിലായിരുന്നു മഞ്ജുവിന്റെ വിജയം. 4-1 എന്ന സ്‌കോറിനായിരുന്നു മഞ്ജുറാണി തായ്‌ലന്റിന്റെ ചത്മാന്‍ റക്‌സാതിനെ പരാജയപ്പെടുത്തിയത്. ഇന്ന് നടക്കുന്ന ഫൈനലില്‍ സെക്കന്‍ഡ് സീഡ് റഷ്യയുടെ ഇകാതറീന പാല്‍റ്റസെവയെ നേരിടും. മറ്റൊരു അരങ്ങേറ്റക്കാരിയായ യമുന ബോറോ ചൈനീസ് തായ് പെയ് താരം ഹാങ് സിയോവോട് പരാജയപ്പെട്ടാണ് പുറത്തായത്.