ലണ്ടന്‍: ചുവന്ന ചെകുത്താന്‍മാരായ മാഞ്ചസ്റ്റര്‍ യുനൈറ്റഡും ഇംഗ്ലീഷ് ഫുട്‌ബോളിന്റെ കരുത്തായ മാഞ്ചസ്റ്റര്‍ സിറ്റിയും തമ്മിലുള്ള മാഞ്ചസ്റ്റര്‍ ഡര്‍ബി ഇന്ന് രാത്രി പത്തിന് മാഞ്ചസ്റ്റര്‍ സിറ്റിയുടെ ഹോം ഗ്രൗണ്ടില്‍ നടക്കും.
ലീഗിലെ തോല്‍വി കാരണം യുനൈറ്റഡ് നെഞ്ചിടിപ്പോടെയാണ് ഇന്നത്തെ മത്സരത്തെ നേരിടുന്നത്. സിറ്റിക്കെതിരേ പരാജയപ്പെട്ടാല്‍ വീണ്ടും പട്ടികയില്‍ പിറകോട്ടുപോകും. അവസാനമായി നടന്ന രണ്ട് മത്സരത്തില്‍ ബേണ്‍മൗത്തിനേയും എവര്‍ട്ടനേയും യുനൈറ്റഡ് പരാജയപ്പെടുത്തിയിരുന്നു. ഇതിനെ തുടര്‍ന്നാണ് യുനൈറ്റഡ് പട്ടികയില്‍ ഏഴാം സ്ഥാനത്തേക്കെങ്കിലുമെത്തിയത്.
തോല്‍വിയുടെ ഭാരത്തില്‍ നിന്ന് കരകയറുന്ന യുനൈറ്റഡിന് ജീവശ്വാസം ലഭിച്ചുതുടങ്ങിയിട്ടുണ്ട്. ഈ ഊര്‍ജം കരുത്താക്കി യുനൈറ്റഡ് സിറ്റിയെ മറിച്ചിടുമോ എന്ന് കാത്തിരുന്ന് കാണേണ്ടി വരും. ലീഗിലെ ടോപ്പറാകാന്‍ ഇനി കഴിയില്ലെങ്കിലും ആദ്യ നാലിലെങ്കിലുമെത്തിക്കുമെന്നായിരുന്നു മൗറീഞ്ഞോ കഴിഞ്ഞ ദിവസം പറഞ്ഞത്.
പ്രീമിയര്‍ ലീഗില്‍ തോല്‍വി അറിയാതെ 12-ാം മത്സരത്തിനാണ് സിറ്റി ഇറങ്ങുന്നത്. മികച്ച ആത്മവിശ്വാസമുള്ള സിറ്റി ഇന്ന് ജയിക്കുമെന്ന വിശ്വാസത്തിലാണ്. സ്വന്തം തട്ടകത്തിലാണെന്ന ആത്മവിശ്വാസവും സിറ്റിക്ക് കരുത്താകും. 11 മത്സരം കളിച്ച സിറ്റി ഒന്‍പത് മത്സരങ്ങള്‍ ജയിക്കുകയും രണ്ട് മത്സരം സമനിലയില്‍ കലാശിക്കുകയും ചെയ്തിട്ടുണ്ട്. 11 മത്സരം കളിച്ച യുനൈറ്റഡിന് ആറു മത്സരത്തില്‍ മാത്രമാണ് ജയിക്കാനായത്. മറ്റു മത്സരങ്ങളില്‍ ലിവര്‍പൂള്‍ ഫുല്‍ഹാമിനെയും ചെല്‍സി എവര്‍ട്ടനെയും നേരിടും. ചെല്‍സി ജയിക്കുകയും സിറ്റിയും ലിവര്‍പൂളും തോല്‍ക്കുകയും ചെയ്താല്‍ ചെല്‍സിക്ക് പട്ടികയില്‍ ഒന്നാം സ്ഥാനത്തെത്താനാകും. രാത്രി 10ന് നടക്കുന്ന മറ്റൊരു മത്സരത്തില്‍ ആഴ്‌സനല്‍ വോള്‍ഫ്‌സിനെ നേരിടും.