കോഴിക്കോട്:കൂടത്തായി കൊലപാതക കേസില്‍ അന്വേഷണം തുടരുന്നു. അന്വേഷണസംഘം കട്ടപ്പനയിലെ ജോളിയുടെ വീട്ടിലെത്തി മാതാപിതാക്കളുടെ മൊഴിയെടുത്തു.വനിതാ പൊലിസ് ഉള്‍പ്പടെ നാലുപേരാണ് കട്ടപ്പനയിലെ വീട്ടിലെത്തിയത്. ഇന്നലെ ജോളിയുടെ സഹോദരിയുടെ വീട്ടിലും അന്വേഷണസംഘം എത്തിയിരുന്നു. പൊലിസ് കസ്റ്റഡിയില്‍ ഉള്ള ജോളിയുടെ ചോദ്യം ചെയ്യല്‍ തുടരുകയാണ്.

ഷാജുവിന്റെ അച്ഛന്‍ സക്കറിയയുടെ മൊഴിയെടുക്കല്‍ വടകര റൂറല്‍ എസ.്പി ഓഫിസില്‍വെച്ച് നടക്കുകയാണ്.
ജോളിയേയും ഷാജുവിനേയും വെവ്വേറെയാണ് ചോദ്യം ചെയ്യുന്നത്. അന്വേഷണത്തിന്റെ തുടക്കത്തിലും ഷാജുവിനെ അന്വേഷണ സംഘം ചോദ്യം ചെയ്തിരുന്നു. ഷാജുവിന്റെ ആദ്യഭാര്യ സിലിയുടേയും മകള്‍ അല്‍ഫൈന്റേയും മരണവുമായി ബന്ധപ്പെട്ട വിവരങ്ങളും അന്വേഷണ സംഘം ഷാജുവിനോട് ചോദിച്ചറിയും.

ഇതിനോടകം ഷാജുവിന്റെ സഹോദരി ഷീനയുടെ മൊഴിയെടുത്തിട്ടുണ്ട്. തിരുവമ്പാടി സി.ഐയാണ് ഷീനയുടെ മൊഴി രേഖപ്പെടുത്തിയത്. ജോളി വിഷം നല്‍കി കൊലപ്പെടുത്തിയെന്ന് സംശയിക്കുന്ന ഷാജുവിന്റെയും സിലിയുടെയും മകള്‍ ആല്‍ഫൈന് താനാണ് ഭക്ഷണം നല്‍കിയതെന്ന് ഷീന മൊഴി നല്‍കി.
ജോളിയെ റവന്യു ഉദ്യോഗസ്ഥര്‍ വഴിവിട്ട് സഹായിച്ചുവെന്ന ആരോപണത്തില്‍ ലാന്‍ഡ് ട്രിബ്യൂണല്‍ തഹസില്‍ദാര്‍ ജയശ്രീയുടെ മൊഴി ഇന്നെടുക്കും. ഡെപ്യൂട്ടി കലക്ടര്‍ സി ബിജുവാണ് മൊഴിയെടുക്കുക. വ്യാജരേഖകള്‍ ഉപയോഗിച്ച് നികുതിയടക്കാന്‍ ജോളിയെ സഹായിച്ചെന്ന വകുപ്പതല അന്വേഷണത്തിന്റെ ഭാഗമായാണ് നടപടി.

പണവും മദ്യവും നല്‍കിയാണ് സയനൈഡ് വാങ്ങിയതെന്ന് മാത്യു മൊഴി നല്‍കി
കൂടത്തായി കൊലപാതകക്കേസിലെ രണ്ടാം പ്രതി മാത്യുവിന്റെ മൊഴിയുടെ വിശദാംശങ്ങള്‍ പുറത്തുവന്നു. പണവും മദ്യവും നല്‍കിയാണ് കേസിലെ മൂന്നാം പ്രതിയും ജ്വല്ലറി ഉടമയുമായ പ്രജികുമാറില്‍ നിന്നും സയനൈഡ് വാങ്ങിയത്്.കൂടാതെ 5000രൂപയും നല്‍കി പെരുച്ചാഴിയെ കൊല്ലാനെന്നു പറഞ്ഞാണ് വാങ്ങിയത്. നേരിട്ടാണ് സയനൈഡ് ജോളിക്ക് കൈമാറിയതെന്നും വീണ്ടും സയനൈഡ് ആവശ്യപ്പെട്ടെങ്കിലും പ്രജികുമാറിന്റെ പക്കലില്ലാത്തതിനാല്‍ ലഭിച്ചിരുന്നില്ല എന്നും മാത്യു മൊഴി നല്‍കി. മാത്യുവിനെ പയ്യോളിയിലുള്ള ക്രൈംബ്രാഞ്ച് ഓഫിസിലെത്തിച്ചാണ് ചോദ്യം ചെയ്യുന്നത്. ക്രൈംബ്രാഞ്ച് ഡിവൈ.എസ്.പി ഹരിദാസന്റെ നേതൃത്വത്തിലുള്ള അന്വേഷണ സംഘത്തിന്റെ ചോദ്യം ചെയ്യല്‍ തുടരുകയാണ്.

തഹസില്‍ദാര്‍ ജയശ്രീയുടെ മൊഴി ഇന്നെടുക്കും. വ്യാജരേഖകള്‍ ഉപയോഗിച്ച് നികുതിയടക്കാന്‍ ജോളിയെ സഹായിച്ചെന്ന വകുപ്പതല അന്വേഷണത്തിന്റെ ഭാഗമായാണ് നടപടി. ഡെപ്യൂട്ടി കലക്ടര്‍ സി.ബിജുവാണ് മൊഴിരേഖപ്പെടുത്തുക. അന്വേഷണ സംഘത്തിന്റെ നിര്‍ദേശപ്രകാരം ജയശ്രീ കലക്ടറേറ്റില്‍ എത്തിയിട്ടുണ്ട്.

അന്വേഷണസംഘം പൊന്നമറ്റത്തെ വീട്ടിലെത്തി തെളിവെടുപ്പ് നടത്തുന്നു. നാട്ടുകാരുടെ മൊഴിയും രേഖപ്പെടുത്തുന്നുണ്ട്.