തിരുവനന്തപുരം:  പര്‍ച്ചപ്പനി പ്രതിരോധിക്കുന്നതിന്റെ ഭാഗമായി മൊബൈല്‍ ക്ലിനിക് ആരംഭിക്കുമെന്നു മേയര്‍ വി.കെ പ്രശാന്ത്. ഇതിനുവേണ്ടി ഡോക്ടര്‍മാര്‍, നഴ്‌സുമാര്‍ എന്നിവരുടെ സേവനം ലഭ്യമാക്കണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നല്‍കിയിട്ടുണ്ട്. അനുമതി ഉടന്‍ ലഭിക്കുമെന്നും മേയര്‍ വ്യക്തമാക്കി. അഞ്ച് ഡോക്ടര്‍മാരും പത്ത് നഴ്‌സുമാരും ഉള്‍പ്പെടുന്ന ടീമാണ് മൊബൈല്‍ ക്ലിനിക്കില്‍ പ്രവര്‍ത്തിക്കുക.പകര്‍ച്ചപ്പനി തടയുന്നതില്‍ രാഷ്ട്രീയ വിരോധം മാറ്റിവെച്ച് ഒറ്റക്കെട്ടായി മുന്നോട്ടുപോകണമെന്നും ബി.ജെ.പി കൗണ്‍സിലര്‍മാരുടെ നടപടികള്‍ നഗരസഭയുടെ പ്രവര്‍ത്തനങ്ങളെ പിറകോട്ട് വലിക്കുന്നുണ്ടെന്നും മേയര്‍ അഭിപ്രായപ്പെട്ടു. ശുചീകരണ പ്രവര്‍ത്തനങ്ങളില്‍ എല്ലാ കൗണ്‍സിലര്‍മാരും സഹകരിക്കണമെന്നും ചില കൗണ്‍സിലര്‍മാര്‍ പ്രഖ്യാപിച്ചിട്ടുള്ള ശുചീകരണയജ്ഞം സ്വാഗതാര്‍ഹമാണെന്നും മേയര്‍ വ്യക്തമാക്കി.
  നഗരസഭ നടത്തുന്ന പ്രതിരോധ പ്രവര്‍ത്തനങ്ങള്‍ പൂര്‍ണ വിജയമാണെന്നും മറിച്ചുള്ള ആരോപണം തെറ്റാണെന്നും അദ്ദേഹം പറഞ്ഞു. കഴിഞ്ഞ രണ്ട് മൂന്ന് ആഴ്ചകളായി വിവിധ പ്രവര്‍ത്തനങ്ങള്‍ നഗരസഭയുടെ നേതൃത്വത്തില്‍ നടത്തിവരുന്നുണ്ട്. നഗരസഭയ്ക്കു കീഴിലുള്ള 85 ശതമാനം വീടുകളിലും ഉറവിട നശീകരണം ഉള്‍പ്പെടെയുള്ള പ്രവര്‍ത്തനങ്ങള്‍ നടത്തിയെന്നും മേയര്‍ വ്യക്തമാക്കി. നഗരത്തില്‍ നിന്ന് 90 ശതമാനം മാലിന്യങ്ങളും നീക്കം ചെയ്യാന്‍ സാധിച്ചിട്ടുണ്ട്. പൊതുനിരത്തുകളിലെ മാലിന്യങ്ങള്‍ രാത്രിയും പകലുംജോലി ചെയ്താണ് നീക്കം ചെയ്തത്.
  പനിപ്രതിരോധിക്കുന്നതിന് ഉറവിട നശീകരണമാണ് പ്രധാനം. അടുത്ത രണ്ട് ആഴ്ച തൂടര്‍ച്ചയായി ശനി, ഞായര്‍ ദിവസങ്ങളില്‍ ഉറവിട നശീകരണ പ്രവര്‍ത്തനങ്ങള്‍ നടത്തുമെന്നും മേയര്‍ അറിയിച്ചു. പ്രതിരോധ മരുന്നുകള്‍ സ്‌ക്വാഡുകള്‍ രൂപീകരിച്ച് വീടുകള്‍ തോറും വിതരണം ചെയ്തിട്ടുണ്ട്.   പ്രതിരോധ പ്രവര്‍ത്തനങ്ങള്‍ നടക്കാത്ത ചില വാര്‍ഡുകള്‍ ശ്രദ്ധയില്‍പ്പെട്ടിട്ടുണ്ട്. ഇവിടങ്ങളില്‍ പ്രത്യേകം നിരീക്ഷണം നടത്തി ആവശ്യമായ നടപടികള്‍ സ്വീകരിക്കും. നഗരസഭയ്ക്ക് ലഭ്യമായ സംവിധാനങ്ങള്‍ പരമാവധി പ്രയോജനപ്പെടുത്തിയാണ് പ്രവര്‍ത്തനങ്ങള്‍ നടത്തുന്നത്. അതും യുദ്ധകാലാടിസ്ഥാനത്തിലാണ് നടത്തിവരികയാണെന്നും മേയര്‍ പറഞ്ഞു.