ന്യൂഡല്‍ഹി: ജി.എസ്.ടി ബില്‍ രാജ്യസഭ കടന്നതിനുപിന്നാലെ കേരളവും പശ്ചിമബംഗാളും എതിര്‍പ്പുമായി രംഗത്തെത്തി. അന്തര്‍സംസ്ഥാനികുതി വീതംവയ്ക്കുന്നതുമായി ബന്ധപ്പെട്ട് കൊല്‍ക്കത്തയില്‍ നടന്ന ധനകാര്യമന്ത്രിമാരുടെ യോഗത്തിലെ ധാരണയ്ക്കു വിരുദ്ധമായ വകുപ്പുകളാണ് രാജ്യസഭ പാസാക്കിയ ബില്ലിലെന്ന് ഇരുസംസ്ഥാനങ്ങളും ചൂണ്ടിക്കാട്ടി.

ഇക്കാര്യമറിയിച്ച് കേരള ധനകാര്യമന്ത്രി ഡോ. തോമസ് ഐസക്, പശ്ചിമബംഗാള്‍ ധനകാര്യമന്ത്രിയും ജി.എസ്.ടി ഉന്നതാധികാര സമിതി ചെയര്‍മാനുമായ അമിത് മിത്ര എന്നിവര്‍ കേന്ദ്ര ധനകാര്യമന്ത്രി അരുണ്‍ ജയ്റ്റ്‌ലിക്കു കത്തെഴുതി. ഇന്‍പുട്ട് ടാക്‌സും റീഫണ്ട് ക്ലെയിമുമായി ലഭിക്കുന്ന തുക സംസ്ഥാനങ്ങളുമായി പങ്കുവയ്ക്കണമെന്നായിരുന്നു യോഗത്തിലെ ധാരണ.

എന്നാല്‍ ബില്ലില്‍ അതില്ലെന്ന് ഡോ. ഐസക് ചൂണ്ടിക്കാട്ടി. ചുരുങ്ങിയത് 22 ശതമാനമെങ്കിലും നികുതി ഏര്‍പ്പെടുത്തണം. മറിച്ചാണെങ്കില്‍ വിഭവസമാഹരണത്തെ ബാധിക്കുമെന്നും അത് സംസ്ഥാനതാല്‍പ്പര്യങ്ങള്‍ക്കു വിരുദ്ധമാണെന്നും ഐസക് കത്തില്‍ പറയുന്നു.

വരുമാനം വീതംവയ്ക്കുന്നതു സംബന്ധിച്ച ബില്ലിലെ വ്യവസ്ഥകളിലാണ് അമിത് മിത്രയും എതിര്‍പ്പ് പ്രകടിപ്പിച്ചത്. രാജ്യസഭയില്‍ ബില്ല് പാസാക്കുമ്പോള്‍ നടന്ന ചര്‍ച്ചയില്‍ ഈ വ്യവസ്ഥകളില്‍ സംസ്ഥാനങ്ങള്‍ക്ക് എതിര്‍പ്പുള്ള കാര്യം ചിലര്‍ ഉന്നയിച്ചിരുന്നെങ്കില്‍ ഇക്കാര്യം ഉദ്യോഗസ്ഥതലത്തില്‍ ചര്‍ച്ച ചെയ്താല്‍ മതിയെന്നും കൂടുതല്‍ വിശദമായ ചര്‍ച്ച വേണ്ടെന്നുമുള്ള നിലപാടാണ് ജയ്റ്റ്‌ലി സ്വീകരിച്ചത്.

ഇന്റര്‍ഗ്രേറ്റഡ് സേവനികുതി കേന്ദ്രസര്‍ക്കാര്‍ സ്വീകരിച്ച് സംസ്ഥാനങ്ങള്‍ക്ക് വിതരണംചെയ്യുമ്പോള്‍ സ്വീകരിക്കേണ്ട സംസ്ഥാനത്തിന്റെ വിഹിതം സംബന്ധിച്ച വ്യവസ്ഥകളിലാണ് പ്രധാന തര്‍ക്കം.

ഈ വ്യവസ്ഥ ഉന്നതാധികാര സമിതിയില്‍ ചര്‍ച്ച ചെയ്തിട്ടില്ലെന്നും അതിനാല്‍ അക്കാര്യത്തില്‍ സമവായമില്ലെന്നും അത് ഒഴിവാക്കണമെന്നുമാണ് അമിത് മിത്ര ആവശ്യപ്പെട്ടത്. ഈ ആവശ്യം തോമസ് ഐസകും ഉന്നയിച്ചിട്ടുണ്ട്.

ജി.എസ്.ടി നടപ്പാക്കുമ്പോള്‍ സംസ്ഥാനങ്ങള്‍ക്കുണ്ടാകുന്ന നഷ്ടം നികത്തുന്നതിന് അഞ്ചു വര്‍ഷം നഷ്ടപരിഹാരം നല്‍കുമെന്ന ജയ്റ്റ്‌ലിയുടെ സഭയിലെ പ്രസ്താവനയില്‍ കൂടുതല്‍ വിശദീകരണം നല്‍കണമെന്നും പശ്ചിമബംഗാള്‍ ആവശ്യപ്പെട്ടിട്ടുണ്ട്.