കൊടുവള്ളി: കരുവന്‍പൊയില്‍ ജി.എം.യു.പി സ്‌കൂളിലെ പ്രീപ്രൈമറി വിഭാഗത്തിലേക്ക് അധ്യാപികമാരെ നിയമിച്ചത് നടപടി ക്രമങ്ങള്‍ പാലിച്ചാണെന്ന് പി.ടി.എ കമ്മിറ്റി ഭാരവാഹികള്‍ അറിയിച്ചു.
 സ്‌കൂളില്‍ മൂന്നു വര്‍ഷമായി ജോലി ചെയ്യുകയായിരുന്ന സുമ എന്ന അധ്യാപികയെ അകാരണമായി നീക്കം ചെയ്‌തെന്ന ആരോപണം വസ്തുതാവിരുദ്ധമാണെന്നും ഭാരവാഹികള്‍ പറഞ്ഞു. പ്രീ പ്രൈമറി വിഭാഗത്തില്‍ അധ്യാപകരെ നിയമിക്കാനുള്ള പൂര്‍ണ അധികാരം പി.ടി.എ കമ്മിറ്റിക്കാണെന്നും കഴിഞ്ഞ നവംബറില്‍ നടന്ന പി.ടി.എ യോഗത്തില്‍ പങ്കെടുത്ത മുഴുവന്‍ അംഗങ്ങളും പുതിയ അധ്യയന വര്‍ഷത്തേക്ക് അഭിമുഖം നടത്തി അധ്യാപികമാരെ നിയമിച്ചാല്‍ മതി എന്ന ആവശ്യം ഉന്നയിച്ചിരുന്നെന്നും പി.ടി.എ പ്രസിഡന്റ് ടി.പി അബ്ദുല്‍ നാസര്‍ പറഞ്ഞു. ഇതുപ്രകാരം പത്രപരസ്യം നല്‍കിയാണ് അഭിമുഖം നടത്തിയത്.
സ്‌കൂളില്‍ കഴിഞ്ഞ മൂന്നു വര്‍ഷം ജോലി ചെയ്തിരുന്ന സുമ എന്ന അധ്യാപികയോട് അഭിമുഖ നടക്കുന്ന വിവരം നേരത്തെ അറിയിച്ചിരുന്നെങ്കിലും ഹാജരായില്ലയെന്നും പി.ടി.എ പ്രസിഡന്റ് പറഞ്ഞു.  13 പേര്‍ പങ്കെടുത്ത അഭിമുഖത്തില്‍ നിന്ന് യോഗ്യതയും സീനിയോറിറ്റിയും മറ്റു മാനദണ്ഡങ്ങളും പാലിച്ചുമാണ് രണ്ടു പേരെ നിയമിച്ചതെന്നും അദ്ദേഹം പറഞ്ഞു. അതേസമയം നിയമനവും ബന്ധപ്പെട്ട കാര്യങ്ങളും നടന്നത് മാര്‍ച്ചില്‍ വിരമിച്ച പ്രധാനാധ്യാപകന്റെ കാലത്താണെന്നും തനിക്ക് അതിനെക്കുറിച്ച് കൂടുതല്‍ അറിയില്ലെന്നും നിലവിലെ പ്രധാനാധ്യാപകന്‍ മജീദ് പറഞ്ഞു.