റിയോ ഡി ജനീറോ: അതനു ദാസ് ഇന്ത്യക്ക് പ്രത്യാശയുടെ ആദ്യ കിരണം സമ്മാനിച്ചു. അമ്പെയ്ത്ത് വ്യക്തിഗത റാങ്കിങ് റൗണ്ടില്‍ അഞ്ചാം സ്ഥാനത്തെത്തി അടുത്ത ഘട്ടത്തിലേക്ക് കടക്കാനും ഇന്ത്യന്‍ താരത്തിനായി. പതുക്കെ തുടങ്ങിയ താരത്തിന് അവസാന മൂന്നു റൗണ്ടുകളിലെ തകര്‍പ്പന്‍ പ്രകടനമാണ് മുന്നോട്ടു നയിച്ചത്.

ആദ്യ മൂന്നു റൗണ്ടുകള്‍ അവസാനിച്ചപ്പോള്‍ 168 പോയിന്റുമായി 19ാം സ്ഥാനത്തായിരുന്നു ദാസ്. നാലാം റൗണ്ടില്‍ 60ല്‍ 57 പോയിന്റ് സ്വന്തമാക്കി തകര്‍പ്പന്‍ തിരിച്ചു വരവ് നടത്താന്‍ ദാസിന് സാധിച്ചു. ഇതോടെ 13ാം റാങ്കിലേക്കാണ് താരം കുതിച്ചത്. നെതര്‍ലന്‍ഡിന്റെ ജെഫ് വാന്‍ ഡെന്‍ ബെര്‍ഗായിരുന്നു ആ സമയത്ത് ഒന്നാം സ്ഥാനത്ത്. വാന്‍ ഡെന്‍ ബെര്‍ഗുമായി എട്ടു പോയിന്റിന്റെ വ്യത്യാസം മാത്രമായിരുന്നു അതനു ദാസിന് ഉണ്ടായിരുന്നു.

എന്നാല്‍ ഇതിനു ശേഷം ദാസിന് തിരിച്ചടി നേരിട്ടു. ആദ്യ പകുതി പിന്നിട്ടപ്പോള്‍ രണ്ടു സ്ഥാനങ്ങളിറങ്ങി 15ാം സ്ഥാനത്തായിരുന്നു താരം. ദക്ഷിണ കൊറിയയുടെ കിം വൂജിന്‍ തുടര്‍ച്ചയായി മികവു പുലര്‍ത്തി ഒന്നാം സ്ഥാനത്തെത്തുകയും ചെയ്തു. ഇടവേളയ്ക്ക് ശേഷമുള്ള 10,11,12 റൗണ്ടുകളില്‍ ഗംഭീര പ്രകടനമാണ് അതനു ദാസ് കാഴ്ച്ച വച്ചത്.

10ാം റൗണ്ടിലെ മികവോടെ 11ാം സ്ഥാനത്തേക്ക് മുന്നേറാന്‍ താരത്തിന് സാധിച്ചു. അടുത്ത റൗണ്ടില്‍ 60ല്‍ 59 പോയിന്റ് സ്വന്തമാക്കിയ താരം നാലു സ്ഥാനങ്ങള്‍ മെച്ചപ്പെടുത്തി ഏഴാം സ്ഥാനത്തേക്ക് കുതിച്ചു.

625 പോയിന്റായിരുന്നു ദാസിന്റെ മൊത്തം സ്‌കോര്‍. 12ാം റൗണ്ടില്‍ വീണ്ടും രണ്ടു സ്ഥാനങ്ങള്‍ മെച്ചപ്പെടുത്തിയ ദാസ് അഞ്ചാം സ്ഥാനം സ്വന്തമാക്കുകയായിരുന്നു. അവസാന 64ലില്‍ നേപ്പാളിന്റെ ജിത്ത്ബഹാദൂര്‍ മുക്തനുമായിട്ട് ചൊവ്വാഴ്ചയാണ് താരത്തിന്റെ മത്സരം.