കാസര്‍കോട്: ചൂരിയില്‍ ഹോട്ടലില്‍ ഭക്ഷണം കഴിക്കാനെത്തിയ സംഘത്തിനു നേരെ അക്രമം. സംഘര്‍ഷത്തില്‍ ഒരാള്‍ക്കു കുത്തേറ്റു. ചൂരിയിലെ അല്‍ത്താഫി(20)നാണു കുത്തേറ്റത്. സംഭവവുമായി ബന്ധപ്പെട്ട് കറന്തക്കാട്ടെ സന്ദീപി(22)നെ പൊലിസ് അറസ്റ്റു ചെയ്തു.
കഴിഞ്ഞ ദിവസം ചൂരിയിലെ ഫാസ്റ്റ് ഫുഡ് ഭക്ഷണശാലയിലാണു സംഭവം. അല്‍ത്താഫും സുഹൃത്ത് ഫയാസും ഭക്ഷണം ഓര്‍ഡര്‍ ചെയ്തു കാത്തിരിക്കുന്നതിനിടയിലാണു ഹോട്ടലില്‍ കയറിയ മൂന്നംഗ സംഘം അക്രമം നടത്തിയത്.
അല്‍ത്താഫിനു നേരെ കത്തിയെടുത്തു വീശുകയായിരുന്നു. സുഹൃത്ത് കസേര എടുത്ത് തടഞ്ഞതിനാല്‍ രക്ഷപ്പെടുകയായിരുന്നു.
നിലവിളി കേട്ട് ഹോട്ടലിലുണ്ടായ മറ്റുള്ളവര്‍ ഓടിയെത്തിയപ്പോള്‍ സന്ദീപിന്റെ കൂടെയുണ്ടായിരുന്ന രണ്ടുപേര്‍ ഓടി രക്ഷപ്പെടുകയായിരുന്നു. പിടിവലിക്കിടെ സന്ദീപിനെ പിടിച്ചു നിര്‍ത്തിയ ശേഷം പൊലിസിനെ ഏല്‍പ്പിക്കുകയായിരുന്നു.
സന്ദീപിന് ആള്‍ക്കൂട്ടത്തിന്റെ മര്‍ദനമേറ്റു പരുക്കുള്ളതിനാല്‍ കാസര്‍കോട് കെയല്‍വെല്‍ ആസ്പത്രിയില്‍ പ്രവേശിപ്പിച്ചു.
ഓടിപ്പോയ രണ്ടുപേരെ തിരിച്ചറിഞ്ഞിട്ടുണ്ടെന്ന് പൊലിസ് അറിയിച്ചു. അല്‍ത്താഫിന്റെ മുഖത്തും ചുമലിലുമാണു കുത്തേറ്റത്.
പരുക്കു ഗുരുതരമല്ലെന്നാണ് വിവരം. സംഭവത്തെ തുടര്‍ന്ന് ചൂരിയിലും പരിസരപ്രദേശത്തും പൊലിസ് കനത്ത സുരക്ഷ ഏര്‍പ്പെടുത്തി.