കോഴിക്കോട്: ഓള്‍ കേരള മാപ്പിള സംഗീത അക്കാദമിയുടെ ഈ വര്‍ഷത്തെ സംസ്ഥാന അവാര്‍ഡുകള്‍ പ്രഖ്യാപിച്ചു. സംഗീത സംവിധായകന്‍ എം.എസ് ബാബുരാജ്, നടിയും നര്‍ത്തകിയുമായ മോനിഷ, കലാമണ്ഡലം ചന്ദ്രിക, മഹാകവി മോയിന്‍കുട്ടി വൈദ്യര്‍, ഡോ. എ.പി.ജെ അബ്ദുല്‍ കലാം എന്നിവരുടെ പേരിലാണ് അവാര്‍ഡുകള്‍ നല്‍കുന്നത്. എം.എസ് ബാബുരാജ് അവാര്‍ഡിന് മീഡിയ ആര്‍ട്ടിസ്റ്റ് യൂസഫ് കാരാട്, മോനിഷ അവാര്‍ഡിന് നയന്‍താര മഹാദേവന്‍, ചന്ദ്രിക ടീച്ചര്‍ പ്രഥമ അവാര്‍ഡിന് കലാക്ഷേത്രം ടി.എസ് അനിയന്‍, മഹാകവി മോയിന്‍കുട്ടി വൈദ്യര്‍ അവാര്‍ഡിന് ഫാരിഷ ഖാന്‍ ആലുവ, ഡോ. എ.പി.ജെ അബ്ദുല്‍ കലാം എക്‌സലന്‍സി അവാര്‍ഡിന് എ.കെ തറുവയ് പേരാമ്പ്ര, നാസര്‍ മാനു കാടാമ്പുഴ എന്നിവര്‍ അര്‍ഹരായി. കാഷ് അവാര്‍ഡും ശില്‍പവും പ്രശസ്തിപത്രവും അടങ്ങുന്നതാണ് അവാര്‍ഡ്.
അവാര്‍ഡ് 20ന് വൈകിട്ട് 6.30ന് ടൗണ്‍ഹാളില്‍ നടക്കുന്ന ചടങ്ങില്‍ എം.ടി വാസുദേവന്‍ നായര്‍ നല്‍കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. സുപ്രഭാതം മാനേജിങ് എഡിറ്റര്‍ നവാസ് പൂനൂര്‍, ആകാശവാണി ആര്‍ട്ടിസ്റ്റ് കെ.എം.കെ വെള്ളയില്‍, കലാമണ്ഡലം അരുണ ആര്‍. മാരാര്‍, അഡ്വ. പി.എം ഹനീഷ എന്നിവരടങ്ങുന്ന ജൂറി കമ്മിറ്റിയാണ് അവാര്‍ഡ് നിര്‍ണയിച്ചത്. വാര്‍ത്താസമ്മേളനത്തില്‍ അക്കാദമി പ്രസിഡന്റ് എന്‍.പി മുഹമ്മദലി, ജനറല്‍ സെക്രട്ടറി കെ.എം.കെ വെള്ളയില്‍, ട്രഷറര്‍ ടി.എം സലീം, എം.കെ.എ കോയ, ഷാജഹാന്‍ ചീകങ്ങന്‍ പങ്കെടുത്തു.