റിയാദ്: റഷ്യന്‍ പ്രസിഡന്റ് വ്‌ളാദ്മിര്‍ പുടിന്‍ ഔദ്യോഗിക സന്ദര്‍ശനത്തിനായി സഊദിയിലെത്തി. സഊദി സന്ദര്‍ശനം പൂര്‍ത്തിയാക്കി പുടിന്‍ ഇന്ന് യു.എ.ഇ സന്ദര്‍ശിക്കും.
ഇറാനുമായി ഏറെ അടുപ്പമുള്ള റഷ്യക്ക് ഇറാന്റെ മുഖ്യ എതിരാളിയായ സഊദിയുമായും നല്ല ബന്ധമാണുള്ളത്. അതിനാല്‍ തന്നെ ഇറാനുമായുള്ള പ്രശ്‌നങ്ങളില്‍ എന്തെങ്കിലും ഇടപെടലുകള്‍ ഉണ്ടാകുമെന്നാണ് കരുതുന്നത്. ഇത് സംബന്ധിച്ച ചര്‍ച്ചകള്‍ നടന്നതായാണ് വിവരം.
സഊദിയുമായി ഇറാന്‍ ചര്‍ച്ചകള്‍ക്ക് തയ്യാറാണെന്ന വാര്‍ത്ത ഇന്നലെ പുറത്ത് വന്നിരുന്നെങ്കിലും സഊദിയുടെ ഭാഗത്ത് നിന്നും ഇത് സംബന്ധിച്ച പ്രതികരണം ഇതുവരെ പുറത്തുവന്നിട്ടില്ല.
ഇറാന്‍ കൂടാതെ സിറിയ, യമന്‍ പ്രശ്‌നങ്ങളും ഫലസ്തീന്‍ പ്രശ്‌നത്തിന് പരിഹാരം കാണുന്നതിനുള്ള ശ്രമങ്ങളും ഗള്‍ഫ് മേഖല നേരിടുന്ന വെല്ലുവിളികളും സഊദി നേതാക്കളും റഷ്യന്‍ പ്രസിഡന്റും വിശകലനം ചെയ്യുമെന്ന് സഊദി മാധ്യമങ്ങള്‍ റിപ്പോര്‍ട്ട് ചെയ്തു.
സഊദിയിലെത്തിയ പുടിനെ സല്‍മാന്‍ രാജാവിന്റെ നേതൃത്വത്തില്‍ റിയാദിലെ അല്‍ യമാമഃ രാജകൊട്ടാരത്തില്‍ സ്വീകരിച്ചു. സല്‍മാന്‍ ബിന്‍ അബ്ദുല്‍ അസീസ് രാജാവുമായും കിരീടാവകാശിയും പ്രതിരോധമന്ത്രിയുമായ മുഹമ്മദ് ബിന്‍ സല്‍മാനുമായും അദ്ദേഹം ചര്‍ച്ചകള്‍ നടത്തി.