ന്യൂഡല്‍ഹി: കര്‍ശന ഉപാധികളോടെയാണെങ്കില്‍ പോലും ആക്രമണത്തിന്റെ ദൃശ്യങ്ങള്‍ ഒരിക്കലും ദിലീപിന് നല്‍കരുതെന്ന് ആക്രമണത്തിനിരയായ നടി സുപ്രിംകോടതിയില്‍ ആവശ്യപ്പെട്ടു. സ്വകാര്യത മൗലിക അവകാശമാണെന്ന സുപ്രിംകോടതിയുടെ ഭരണഘടനാ ബെഞ്ചിന്റെ ഉത്തരവ് ചൂണ്ടിക്കാട്ടി എഴുതിനല്‍കിയ അപേക്ഷയിലാണ് നടി ഇക്കാര്യം ആവശ്യപ്പെട്ടത്.
സൈ്വരജീവിതം നയിക്കാന്‍ തനിക്ക് അജ്ഞാതയായി തന്നെ തുടരണം. ഈ സാഹചര്യത്തില്‍ പീഡന ദൃശ്യങ്ങള്‍ ദിലീപിന് കൈമാറുന്നത് തന്റെ സ്വകാര്യതയെ ബാധിക്കും. നിക്ഷ്പക്ഷവും സ്വതന്ത്രവുമായ വിചാരണ പ്രതിയുടെ അവകാശമാണെങ്കിലും, തന്റെ സ്വകാര്യതയെ ബാധിക്കുന്ന തരത്തിലാകരുത് അത്. ദിലീപിനോ അദ്ദേഹം ചുമതലപ്പെടുത്തുന്നവര്‍ക്കോ ദൃശ്യങ്ങള്‍ കാണുന്നതിന് എതിര്‍പ്പില്ല. എന്നാല്‍ പകര്‍പ്പ് യാതൊരുവിധത്തിലും കൈമാറരുതെന്നും നടി ആവശ്യപ്പെട്ടു.
തന്റെ നിരപരാധിത്വം തെളിയിക്കാന്‍ ദൃശ്യങ്ങള്‍ വേണമെന്നും അതിനാല്‍ അത് കൈമാറണമെന്നുമാവശ്യപ്പെട്ട് ദിലീപ് നല്‍കിയ ഹരജിയാണ് ഇക്കാര്യത്തില്‍ ജസ്റ്റിസ് എ.എം ഖാന്‍വില്‍ക്കര്‍ അധ്യക്ഷനായ ബെഞ്ച് മുന്‍പാകെയുള്ളത്. ഈയാവശ്യം ഹൈക്കോടതി തള്ളിയതോടെയാണ് നടന്‍ സുപ്രിംകോടതിയെ സമീപിച്ചത്.
ദൃശ്യങ്ങള്‍ കേസിലെ രേഖയാണെങ്കില്‍ പോലും അവ ദിലീപിന് കൈമാറരുതെന്ന് നേരത്തെ സംസ്ഥാന സര്‍ക്കാരും കോടതിയോട് ആവശ്യപ്പെട്ടിരുന്നു.
ദൃശ്യങ്ങള്‍ ഉള്‍കൊള്ളുന്ന മെമ്മറി കാര്‍ഡ് തൊണ്ടിമുതല്‍ ആണ്. എന്നാല്‍ അതിലെ ദൃശ്യങ്ങള്‍ കേസിലെ രേഖ ആണ്. പക്ഷേ ദൃശ്യങ്ങള്‍ ദിലീപിന് കൈമാറിയാല്‍ അവ ദുരുപയോഗം ചെയ്യാന്‍ സാധ്യത ഉണ്ടെന്നും നടിയുടെ സ്വകാര്യതയെ അത് ബാധിക്കുമെന്നും സര്‍ക്കാര്‍ കോടതിയില്‍ നിലപാടെടുത്തിരുന്നു.