സിഡ്‌നി: ആസ്‌ത്രേലിയന്‍ ഓപണ്‍ ബാഡ്മിന്റണ്‍ സൂപ്പര്‍ സീരീസിന് ഇന്ത്യന്‍ താരം പി കശ്യപിന് യോഗ്യത. ചൈനയുടെ സാവോ ജുന്‍പെങ്, ജപ്പാന്റെ കസുമാസ സകായ് എന്നിവരെ സിംഗിള്‍ മത്സരത്തില്‍ പരാജയപ്പെടുത്തിയാണ് താരം യോഗ്യത സ്വന്തമാക്കിയത്.
സാവോ ജുന്‍പെങിനെ 21-15, 21-18, എന്ന സ്‌കോറിനും സകായിയെ 21-5, 21-16 എന്ന സ്‌കോറിനുമാണ് കശ്യപ് പരാജയപ്പെടുത്തിയത്. ലോക ഒന്നാം നമ്പര്‍ താരം സോന്‍ വാന്‍ ഹോവാണ് താരത്തിന് ടൂര്‍ണമെന്റില്‍ എതിരാളി.
കെ ശ്രീകാന്ത്, എച്.എസ് പ്രാണോയ്, സിറില്‍ വര്‍മ, റുത്‌വിക ശിവാനി എന്നിവരും ടൂര്‍ണമെന്റിന് യോഗ്യത നേടിയിട്ടുണ്ട്. ശ്രീകാന്തിന് ആദ്യ മത്സരത്തില്‍ ചാവോ യു, പ്രാണോയിക്ക് ലീ ചോങ് വെ, സിറിലിന് യെഹിസ്‌കില്‍ ഫ്രിറ്റ്‌സ്, റുത്‌വികയ്ക്ക് സില്‍വിന കുര്‍നിയാവാന്‍ എന്നിവരാണ് ആദ്യ മത്സരത്തില്‍ എതിരാളി.