പൊന്നാനി: നഗരസഭാ ചെയര്‍മാന്‍ ഫേസ്ബുക്കില്‍ നല്‍കിയ സഹായാഭ്യര്‍ഥനയ്ക്ക് അജ്ഞാതന്റെ കൈത്താങ്ങ്. പേരു വെളിപ്പെടുത്താത്ത ഒരാളാണ് ചെയര്‍മാന്‍ ആവശ്യപ്പെട്ട സഹായങ്ങളുമായി നഗരസഭാ ഓഫിസിലെത്തിയത്. ബഡ്‌സ് റീഹാബിലിറ്റേഷന്‍ സെന്ററിന്റെ വാഹനം കൈമാറുന്ന ചടങ്ങുമായി ബന്ധപ്പെട്ടു ചെയര്‍മാന്‍ ഫേസ്ബുക്കില്‍ പോസ്റ്റിട്ടിരുന്നു.
പോസ്റ്റില്‍ സെന്ററിന്റെ അടിയന്തിരമായ ചില ആവശ്യങ്ങള്‍ സൂചിപ്പിച്ചു. ഒരു ഇന്‍ഡക്ഷന്‍ കൂക്കറും വാട്ടര്‍ പ്യൂരിഫയറുമായിരുന്നു അത്യാവശ്യം. തുടര്‍ന്നാണ് ഇന്നലെ രാവിലെ ഒരാള്‍ നഗരസഭാ ഓഫിസിലെത്തി ഇതു രണ്ടും ഏല്‍പ്പിച്ചത്. സഹായിച്ച വ്യക്തിയെ തിരിച്ചറിഞ്ഞില്ലെങ്കിലും ഫേസ്ബുക്ക് പോസ്റ്റിനു ഗുണമുണ്ടായ സന്തോഷത്തിലാണ് ചെയര്‍മാന്‍.