നിലമ്പൂര്‍: ഹൈക്കോടതി വിധിയെത്തുടര്‍ന്ന് തിരിച്ചുകിട്ടിയ ഭൂമിയില്‍ കൃഷിയും, നിര്‍മാണ പ്രവൃത്തിയും നടത്താന്‍ പൊലിസ് സംരക്ഷണം വേണമെന്നാവശ്യപ്പെട്ട് കല്യാണി ഗ്രൗണ്ട് ഉടമ കണ്ണാട്ടില്‍ ഫാത്തിമബീവി നിലമ്പൂര്‍ പൊലിസ് സ്‌റ്റേഷനില്‍ പരാതിയുമായി എത്തി.
നാട്ടുകാര്‍ വര്‍ഷങ്ങളായി കളിസ്ഥലമായി ഉപയോഗിച്ചുവന്നിരുന്ന ഗ്രൗണ്ടാണ് ഹൈക്കോടതി നിര്‍ദേശപ്രകാരം മഞ്ചേരി മുന്‍സിഫ് കോടതി ഭൂമി ഫാത്തിമബീവിക്ക് തിരിച്ചു കൊടുത്തത്. ഈ മാസം ഒന്നിനാണ് കോടതി ആമീന്റെ നേതൃത്വത്തില്‍ താലൂക്ക് സര്‍വേയറുടെ സാന്നിധ്യത്തില്‍ ഒരേക്കര്‍ നാലു സെന്റ് സ്ഥലം അളന്ന് കമ്പിവേലി കെട്ടിത്തിരിച്ച് ഫാത്തിമാ ബീവിക്ക് നല്‍കിയത്. ജനങ്ങളുടെ പ്രതിഷേധം ഉണ്ടാകുമെന്ന സൂചനയെത്തുടര്‍ന്ന് വന്‍ പൊലിസ് സന്നാഹത്തോടെയാണ് ഭൂമി അളന്ന് നല്‍കിയിരുന്നത്. എന്നാല്‍ പിറ്റേദിവസം തന്നെ ചിലര്‍ കമ്പിവേലി തകര്‍ത്തു. പൊലിസില്‍ പരാതി നല്‍കിയെങ്കിലും നടപടിയുണ്ടായില്ല.
തനിക്ക് ഒരു സെന്റ് സ്ഥലം പോലും ഇല്ലെന്നും 16വര്‍ഷമായി എറണാകുളത്ത് വാടക വീട്ടില്‍ കഴിയുകയാണെന്നും ഫാത്തിമ ബീവി പറഞ്ഞു. ന്യായമായ വില കിട്ടിയാല്‍ ഭൂമി നഗരസഭയ്ക്ക് നല്‍കുന്നതിന് താന്‍ ഒരുക്കമാണ്. ആരു നല്ലവില നല്‍കിയാലും ഭൂമി നല്‍കുമെന്നും തനിക്ക് ആരോടും വിരോധമില്ലെന്നും ഇവര്‍ പറഞ്ഞു. ജനങ്ങളുടെ പ്രതിഷേധത്തെത്തുടര്‍ന്ന് തനിക്ക് കൃഷി നടത്താനോ നിര്‍മാണ പ്രവൃത്തി നടത്താനോ പൊലിസ് സഹായം അനിവാര്യമാണെന്ന് കാണിച്ച് നിലമ്പൂര്‍ സി.ഐ, എസ്.ഐ എന്നിവര്‍ക്കാണ് ഇന്നലെ പരാതി നല്‍കിയത്.