കുണ്ടറ: മാനസികാസ്വാസ്ഥ്യമുള്ള വയോധികനെ ആക്രമിച്ച സംഭവത്തില്‍ നാലുപേരെ പൊലിസ് അറസ്റ്റ് ചെയ്തു. മുളവന സ്വദേശി ജോണ്‍സണ്‍, പ്രസാദ്, രമേശ്, രവികുമാര്‍ എന്നിവരെയാണ് കുണ്ടറ പൊലിസ് ഇന്നലെ രാവിലെ അറസ്റ്റ് ചെയ്തത്. അക്രമത്തിന് നേതൃത്വം നല്‍കിയത് മുളവന സ്വദേശികളായ ജോണ്‍സണും പ്രസാദും ആണെന്ന് പൊലീസ് കഴിഞ്ഞദിവസം രാത്രി തന്നെ തിരിച്ചറിഞ്ഞിരുന്നു. 

ഇന്നലെ രാവിലെയോടെ മറ്റ് പ്രതികളെയും കണ്ടെത്തി. അതിര്‍ത്തിക്കല്ല് ഇളക്കിമാറ്റാന്‍ ശ്രമിച്ചതാണ് വയോധികനെ ആക്രമിക്കാന്‍ പ്രതികളെ പ്രകോപിപ്പിച്ചതെന്ന് പൊലിസ് അറിയിച്ചു. ആക്രമിക്കുന്ന ദൃശ്യങ്ങള്‍ അടക്കം മാധ്യമങ്ങള്‍ ഇന്നലെ പുറത്തു വിട്ടിരുന്നു. ഇതോടെ ബന്ധുക്കള്‍ പൊലിസിന് പരാതി നല്‍കുകയായിരുന്നു. പരുക്കേറ്റ ഇളമ്പള്ളൂര്‍ കോവില്‍മുക്ക് സന്തോഷ് ഭവനില്‍ ശശിധരന്‍ ജില്ലാ ആശുപത്രിയില്‍ ചികിത്സയിലാണ്.